ஒரே ஒரு லாட்டரி டிக்கெட் ஒட்டுமொத்த வாழ்க்கையையும் தலைகீழாக மாற்றிவிடும் என்பதற்கு சாட்சியாக, டெல்லியைச் சேர்ந்த பெண் ஒருவருக்கு அபுதாபி பிக் டிக்கெட் குலுக்கலில் ரூ.58 கோடி முதல் பரிசு அடித்துள்ளது. ஐக்கிய அரபு அமீரகத்தின் அபுதாபியில் புகழ்பெற்ற ‘பிக் டிக்கெட்’ (Big Ticket – 288) லாட்டரி விற்பனை தொடர்ந்து நடைபெற்று வருகிறது. இதில் “சும்மா வாங்கிப் பார்ப்போமே” என்று 476107 என்ற எண் கொண்ட ஒரே ஒரு டிக்கெட்டை வாங்கிய டெல்லி பெண் கனிகா அரோராவிற்கு, இன்று பிக் டிக்கெட் நிர்வாகத்திடம் இருந்து முதல் பரிசு விழுந்ததற்கான தொலைபேசி அழைப்பு வந்துள்ளது. இந்த இன்ப அதிர்ச்சியை எதிர்பாராத கனிகா, “என்னால் இதை நம்பவே முடியவில்லை, இவ்வளவு பெரிய தொகை பரிசாகக் கிடைக்கும் என்று நான் நினைக்கவில்லை” எனத் தன் மகிழ்ச்சியை நெகிழ்ச்சியோடு பகிர்ந்துள்ளார்.
அதிர்ஷ்டக் காற்றில் அபுதாபியே நனைந்து கொண்டிருக்கும் வேளையில், துபாயில் வசித்து வரும் மற்றொரு இந்தியரான ட்விங்கிள் அல்பின் என்பவருக்கும் அதிர்ஷ்ட மழை கொட்டியுள்ளது. இவர் வாங்கிய 028681 என்ற பிக் டிக்கெட் எண்ணிற்கு, அபுதாபி குலுக்கலில் அதிநவீன ‘பிஎம்டபிள்யூ’ (BMW) சொகுசு கார் பரிசாக விழுந்துள்ளது. ஒரே நாளில் சாதாரண மனிதராக இருந்து, சொகுசு காரின் அதிபதியாக மாறியுள்ள இவரின் மகிழ்ச்சிக்கு எல்லையே இல்லை.
இவர்களைத் தவிர, இந்த பிக் டிக்கெட் குலுக்கலில் மேலும் 5 இந்தியர்களுக்குத் தலா 1 மில்லியன் திர்ஹம் (இந்திய மதிப்பில் சுமார் ரூ.2.3 கோடி) பரிசு விழுந்து கோடீஸ்வரர்களாகியுள்ளனர். ஷார்ஜாவைச் சேர்ந்த அகில் என்.பி., அபுதாபியின் சிவபிரசாத் ரவீந்திரன், ராஸ் அல் கைமாவின் உபேந்திரன் சிஜு மற்றும் மங்களூரைச் சேர்ந்த லான்சி பைஸ் உள்ளிட்டோர் இந்த கோடிக்கணக்கான பரிசு மழையில் நனைந்துள்ளனர். இதன் மூலம் அபுதாபி பிக் டிக்கெட் குலுக்கலில் இந்தியர்களின் கொடி மீண்டும் ஒருமுறை பறந்துள்ளது.
தமிழகம் மற்றும் கேரளாவைச் சேர்ந்த லட்சக்கணக்கான இந்தியர்கள் ஐக்கிய அரபு அமீரகத்தில் வாழ்ந்து வரும் நிலையில், அங்கு நடத்தப்படும் இந்த லாட்டரி குலுக்கல்களில் இந்தியர்கள் தொடர்ந்து பெரும் தொகையை வென்று சாதனை படைத்து வருகின்றனர். இதற்கு முன்பும் பல இந்தியர்கள் கோடீஸ்வரர்களாக மாறியுள்ள நிலையில், தற்போது ஒரே நாளில் டெல்லி பெண்ணிற்கு ரூ.58 கோடியும், பிற இந்தியர்களுக்குக் கார்களும், கோடிக்கணக்கான பணமும் கிடைத்துள்ளது ஒட்டுமொத்த இந்திய வம்சாவளியினரிடையேயும் பெரும் வியப்பையும் கொண்டாட்டத்தையும் ஏற்படுத்தியுள்ளது.