தமிழக அரசியலில் நிலவி வரும் பரபரப்பான சூழலுக்கு மத்தியில், தமிழக வெற்றிக் கழகம் ஆட்சி அமைப்பதற்கான முயற்சிகளில் ஒரு முக்கிய திருப்பம் ஏற்பட்டுள்ளது. இது குறித்து திமுக தலைவர் மு.க. ஸ்டாலின் ‘டைம்ஸ் ஆஃப் இந்தியா’ நாளிதழுக்கு அளித்த பேட்டியில், தவெக தலைவர் விஜய் ஆட்சி அமைக்கப் போவதை தாங்கள் தடுக்கப் போவதில்லை என்றும், புதிய அரசுக்கு ஆறு மாத காலத்திற்கு எந்தவிதமான இடையூறுகளையும் திமுக வழங்காது என்றும் தெரிவித்துள்ளார். தமிழ்நாட்டில் உடனடியாக ஒரு அரசியலமைப்பு நெருக்கடியையோ அல்லது மற்றொரு தேர்தலையோ தாங்கள் விரும்பவில்லை என்பதையும் அவர் இதன் மூலம் தெளிவுபடுத்தியுள்ளார்.
புதிய அரசு அமையப்போகும் வேளையில், திமுக ஆட்சியில் கொண்டுவரப்பட்ட மக்கள் நலத்திட்டங்களை விஜய் தொடர்ந்து செயல்படுத்த வேண்டும் என்று ஸ்டாலின் வேண்டுகோள் விடுத்துள்ளார். குறிப்பாக, பள்ளி மாணவர்களுக்கான இலவச காலை உணவுத் திட்டம் மற்றும் மகளிருக்கான மாதம் ரூ.1,000 உரிமைத்தொகை திட்டம் ஆகியவை தடையின்றி தொடர வேண்டும் என்பதே தனது முதன்மையான விருப்பம் என அவர் குறிப்பிட்டுள்ளார். மேலும், தவெக தனது தேர்தல் அறிக்கையில் கொடுத்த வாக்குறுதிகளை நிறைவேற்ற வேண்டும் என்று எதிர்பார்ப்பதாகவும் அவர் கூறியுள்ளார்.
விஜய்யின் தேர்தல் வாக்குறுதிகள் குறித்துப் பேசிய ஸ்டாலின், மகளிருக்கு மாதம் ரூ.2,500 வழங்கப்படும் என்ற அறிவிப்பைச் செயல்படுத்துவது மிகவும் கடினம் எனத் தெரிவித்துள்ளார். “நாங்கள் செய்தது போல குறைந்தபட்சம் ரூ.1,000 ஆவது கொடுங்கள்” எனக் கூறியுள்ள அவர், திமுக அரசு 2021-ல் அளித்த வாக்குறுதிகளில் 90 சதவீதத்தை நிறைவேற்றியுள்ளதாகச் சுட்டிக்காட்டினார். மேலும், ஆண்டுக்கு ஆறு இலவச காஸ் சிலிண்டர்கள் போன்ற தவெக-வின் வாக்குறுதிகள் சாத்தியப்படுமா என்பது சந்தேகமே என்றும், ஒருவேளை அவர்கள் அதைச் செய்தால் மகிழ்ச்சிதான் என்றும் அவர் கூறியுள்ளார்.
தற்போதுள்ள அரசியல் சூழலில் அதிமுக மற்றும் திமுக இணைந்து கூட்டணி ஆட்சி அமைக்கப்போவதாக நிலவி வந்த வதந்திகளுக்கு ஸ்டாலினின் இந்தப் பேட்டி முற்றுப்புள்ளி வைத்துள்ளது. அதேநேரம், தவெக தலைவர் விஜய்க்கு 112 எம்.எல்.ஏ-க்களின் ஆதரவு மட்டுமே இருப்பதால், பெரும்பான்மைக்குத் தேவையான 118 எம்.எல்.ஏ-க்களின் ஆதரவை உறுதி செய்த பிறகே பதவிப்பிரமாணம் செய்ய ஆளுநர் அறிவுறுத்தியதாகத் தெரிகிறது. இதனால் விசிக மற்றும் கம்யூனிஸ்ட் கட்சிகளின் ஆதரவைப் பெறும் முயற்சியில் விஜய் ஈடுபட்டுள்ளார். இதன் காரணமாக இன்று நடைபெறவிருந்த பதவியேற்பு விழா தள்ளிப்போயுள்ளதாகத் தகவல்கள் தெரிவிக்கின்றன.