“நோ.. நோ.. நீங்களே பேசுங்க”…. செய்தியாளர்களை கண்டதும் எஸ்கேப் ஆன ‘புரோட்டோகால்’ பிரியா… ரிப்பன்பில்டிங்கில் நடந்த அந்த ஒரு சம்பவம்….!

தமிழகத்தில் தவெக தலைமையில் புதிய அரசு அமைந்து ஒரு மாதத்தை நிறைவு செய்துள்ள நிலையில், சென்னை மாநகராட்சி மேயர் பிரியா இதுவரையில் முதலமைச்சர் விஜய் அவர்களை மரியாதை நிமித்தமாகக் கூட சந்திக்காதது அரசியல் வட்டாரத்தில் பெரும் விவாதத்தைக் கிளப்பியுள்ளது. தவெக அரசை மேயர் பிரியா புறக்கணிப்பதாக ஒரு தரப்பினர் விமர்சித்து வரும் சூழலில், மக்கள் பணிகளில் ஒருங்கிணைந்து செயல்படாமல் விருப்பு வெறுப்புகளைக் காட்டுவது முறையல்ல என்ற கருத்துக்களும் பரவலாக எழுந்துள்ளன.

இதற்கிடையே, கடந்த ஜூன் 4-ஆம் தேதி சென்னை ஆர்.கே.நகர் பகுதியில் நடைபெற்ற பள்ளி வகுப்பறை திறப்பு விழாவில், தவெக சட்டமன்ற உறுப்பினர் பல்லவி அவர்களுக்கு உரிய முன்னுரிமை வழங்கப்படாமல் அவமதிக்கப்பட்டதாக சர்ச்சை வெடித்தது. இதுகுறித்த கேள்விக்கு, அனைத்தும் அரசு ‘புரோட்டோக்கால்’ முறைப்படியே நடந்ததாக மேயர் பிரியா விளக்கமளித்த போதிலும், மக்களால் தேர்ந்தெடுக்கப்பட்ட பிரதிநிதிகளுக்கு முன்னுரிமை தராததால் சமூக வலைத்தளங்களில் அவரை நெட்டிசன்கள் “புரோட்டோகால் பிரியா” என்று விமர்சிக்கத் தொடங்கினர்.

இந்த பரபரப்பான அரசியல் சூழ்நிலைக்கு மத்தியில், சென்னை ரிப்பன் கட்டிடத்தில் மாநகராட்சிப் பள்ளி மாணவர்களுக்கான கல்வி ஊக்கத்தொகை வழங்கும் விழா நடைபெற்றது. இதில் தவெக அரசைச் சேர்ந்த பள்ளிக்கல்வி மற்றும் செய்தித்துறை அமைச்சர் ராஜ்மோகனும், மேயர் பிரியாவும் முதன்முறையாக ஒரே மேடையில் பொது நிகழ்ச்சியில் கலந்து கொண்டு மாணவர்களுக்கு ஊக்கத்தொகைகளை வழங்கினர்.

நிகழ்ச்சி முடிந்ததும் அமைச்சர் ராஜ்மோகன் செய்தியாளர்களைச் சந்திக்க ஆயத்தமானார். அப்போது அங்கு வந்த மேயர் பிரியாவை, “அம்மா வர்றீங்களா, பத்திரிகையாளர் சந்திப்பில் பேசலாம்” என்று அமைச்சர் அழைத்தார். ஆனால், அதற்கு “இல்லை இல்லை… நீங்க பேசுங்க, நான் வருகிறேன்” என்று கூறிவிட்டு, செய்தியாளர்களைச் சந்திப்பதைத் தவிர்த்து மேயர் பிரியா அவசர அவசரமாக அங்கிருந்து கிளம்பினார். ‘இன்னும் 6 மாதத்திற்கு இவர்களோடு எப்படி ஓட்டப் போகிறோம்’ என்ற பதற்றத்துடனே மேயர் அங்கிருந்து நகர்ந்தார் என நெட்டிசன்கள் இந்த வீடியோவைப் பகிர்ந்து சமூக வலைத்தளங்களில் வைரலாக்கி வருகின்றனர்.