“வைகோ கேட்ட பதவி… மறுத்த விஜய்”…. தவெக ஆட்சி அமைக்க உதவிய வெங்கட் நாராயணா… டெல்லி சிறப்பு பிரதிநிதி நியமனத்தின் பின்னணியில் இருக்கும் ரகசியம்….!

தமிழக அரசின் டெல்லி சிறப்பு பிரதிநிதியாக ‘ஜனநாயகன்’ திரைப்படத் தயாரிப்பாளர் வெங்கட் நாராயணா நியமனம் செய்யப்பட்டுள்ளது அரசியல் வட்டாரத்தில் பெரும் விவாதங்களை ஏற்படுத்தியுள்ளது. பெங்களூரைச் சேர்ந்த ரியல் எஸ்டேட் அதிபரான இவரை, மேகதாது அணை விவகாரம் போன்ற கர்நாடகாவுடனான சிக்கல்கள் நீடிக்கும் சூழலில் விஜய் தேர்வு செய்திருப்பது பலரது புருவங்களை உயர்த்தியுள்ளது. முன்னதாக, தவெக ஆட்சி அமைக்க உரிமை கோரி ஆளுநர் அர்லேகரை விஜய் சந்தித்த போதே வெங்கட் நாராயணா உடன் சென்றிருந்தார். அப்போதே இவருக்கான முக்கியத்துவம் என்ன என்ற கேள்வி எழுந்த நிலையில், தற்போது கிடைத்துள்ள டெல்லி சிறப்பு பிரதிநிதி பதவி அதற்கான விடையாக அமைந்துள்ளது.

மறுபுறம், இந்த முக்கிய பொறுப்பைக் கைப்பற்ற மதிமுக பொதுச்செயலாளர் வைகோ தீவிரமாக காய் நகர்த்தி வந்தார். தமக்கு தற்போது ராஜ்ய சபா எம்பி பதவி இல்லாத சூழலில், டெல்லியில் தமக்குள்ள நீண்டகால அரசியல் செல்வாக்கை முன்வைத்து தவெகவிடம் இந்த பதவியைக் கோரினார். ஆனால், மதிமுகவின் கோரிக்கையை முதல்வர் விஜய் முற்றிலுமாக நிராகரித்துவிட்டார். மத்திய அரசுடன் எவ்வித மோதல் போக்கும் இன்றி இணக்கமாகச் செல்லவே தவெக தலைமை விரும்புகிறது. தமிழ்நாட்டின் திட்டங்களைச் செயல்படுத்த மத்திய அரசின் நிதி ஆதாரங்கள் தேவை என்பதால், திரைமறைவில் பாஜகவுடன் ஒரு சுமுகமான உறவைப் பேணவே வெங்கட் நாராயணாவை விஜய் ‘டிக்’ செய்துள்ளார் என்று அரசியல் நிபுணர்கள் கருதுகின்றனர்.

இதற்கு முன்பாக, ‘ஜனநாயகன்’ படத்தின் சென்சார் சிக்கலின் போதே டெல்லி மற்றும் பாஜக மேலிடத் தொடர்புகளைப் பயன்படுத்த வெங்கட் நாராயணா தயாராக இருந்தார். மேலும், தவெக ஆட்சி அமைக்க டெல்லி தரப்பில் முட்டுக்கட்டைகள் போடப்பட்ட போது, வெங்கட் நாராயணா மூலமாகவே பேசப்பட்டு சுமுக உடன்பாடு எட்டப்பட்டது. இந்த இக்கட்டான சூழலில் அவர் ஆற்றிய தூதுவர் பணி, முதல்வர் விஜய்க்கு அவர் மீது அசைக்க முடியாத நம்பிக்கையை ஏற்படுத்தியுள்ளது. டெல்லிக்கும் தமிழ்நாட்டிற்கும் இடையிலான பேச்சுவார்த்தைகளிலும், நிர்வாக ரீதியிலான தொடர்புகளிலும் எந்தவொரு முடக்கமும் ஏற்படாமல் காரியம் சாதிக்க வெங்கட் நாராயணாவின் நியமனமே சரியானது என்ற இறுதி முடிவுக்கு விஜய் வந்துள்ளார்.