பழிக்குப்பழி?… நண்பனின் துரோகம்… காதலியின் பழிவாங்கல்… ஐடி வட்டாரத்தை அதிரவைத்த கடத்தல் & பலாத்கார விவகாரம்…!!

பெங்களூரு மாரத்தஹள்ளியில் தங்கி தகவல் தொழில்நுட்ப நிறுவனத்தில் பணியாற்றி வந்த மகேந்திரா மற்றும் தருண் ஆகிய இரு என்ஜினீயர்கள் மீது பாலியல் வன்கொடுமை புகார் எழுந்தது. அவர்களது அறையில் தங்கியிருந்த நண்பர் மஞ்சு சொந்த ஊருக்குச் சென்றிருந்த வேளையில், அவரது மற்றொரு நண்பரான ராஜ்குமார் தனது காதலியுடன் அங்கு வந்துள்ளார். அப்போது ராஜ்குமாரைத் தனி அறையில் பூட்டிவிட்டு, அவரது காதலியை மகேந்திராவும் தருணும் கூட்டுப் பாலியல் வன்கொடுமை செய்து, வெளியே சொன்னால் கொலை செய்துவிடுவதாக மிரட்டியுள்ளனர்.

இதனால் ஆத்திரமடைந்த பாதிக்கப்பட்ட பெண், தனது காதலன் ராஜ்குமார் மற்றும் நண்பர் மஞ்சுவுடன் இணைந்து அந்த இரு என்ஜினீயர்களையும் பழிவாங்க முடிவெடுத்தார். வேறு சில நபர்களின் உதவியுடன் மகேந்திரா மற்றும் தருணை ஆட்கடத்தல் செய்த அந்த கும்பல், அவர்களை ஆள்நடமாட்டமில்லாத இடத்திற்கு கொண்டு சென்று கடுமையாகத் தாக்கியது. அத்துடன் மகேந்திராவின் தந்தையிடம் ரூ.10 லட்சம் கேட்டு மிரட்டியதோடு, இருவரையும் கொலை செய்துவிட்டு அதனைத் தற்கொலையாகச் சித்தரிக்கவும் திட்டமிட்டனர்.

மகேந்திராவின் தந்தை அளித்த புகாரின்பேரில் மாரத்தஹள்ளி போலீசார் தீவிர விசாரணை நடத்தி, மஞ்சுவின் சந்தேகத்திற்கிடமான நடவடிக்கையின் மூலம் உண்மையை வெளிக்கொண்டுவந்தனர். கண்காணிப்பு கேமராக்கள் உதவியுடன் நாகரபாவி பகுதியில் பதுக்கி வைக்கப்பட்டிருந்த இருவரையும் காயங்களுடன் மீட்டனர். கடத்தல் மற்றும் கொலை முயற்சியில் ஈடுபட்ட இளம்பெண், அவரது காதலன் உட்பட 11 பேரையும், பாலியல் குற்றச்சாட்டின் பேரில் பாதிக்கப்பட்ட இரு என்ஜினீயர்களையும் போலீசார் கைது செய்தனர்.