“பழிக்குப்பழி”… அமெரிக்காவிற்கு அதிர்ச்சி வைத்தியம் கொடுத்த மோஜ்தபா கமேனி… வளைகுடா நாடுகளில் வெடிக்கப்போகும் அடுத்த அணுகுண்டு இதுதான்….!

ஈரான் மற்றும் அமெரிக்கா இடையே தற்போது தற்காலிகப் போர் நிறுத்தம் அமலில் உள்ள போதிலும், பிராந்தியத்தில் பதற்றம் குறையவில்லை. ஈரானின் புதிய சுப்ரீம் லீடராகப் பொறுப்பேற்றுள்ள மோஜ்தபா கமேனி, அமெரிக்காவின் முந்தைய தாக்குதல்களுக்கு நிச்சயம் பழிவாங்கப்படும் என்று அதிரடியாக அறிவித்துள்ளார். மறைந்த தலைவர் அலி கமேனி மற்றும் மோதல்களில் உயிரிழந்த வீரர்களின் தியாகத்திற்குப் ஈடாக, அமெரிக்கா மற்றும் அதன் நட்பு நாடுகளுக்குத் தகுந்த பதிலடி கொடுக்கப்படும் என்று அவர் உறுதிபடத் தெரிவித்துள்ளார். தற்காலிகப் போர்நிறுத்தக் காலம் என்பது பின்வாங்குவதற்கான அடையாளம் அல்ல, மாறாக அடுத்தகட்ட நகர்வுக்கான தயாரிப்பு என்பதை மோஜ்தபா தனது உரையில் கோடிட்டுக் காட்டியுள்ளார்.

ஈரானின் இந்த எச்சரிக்கையில் மிக முக்கியமாகப் பார்க்கப்படுவது உலக வர்த்தகத்தின் உயிர்நாடியாக விளங்கும் ஹார்முஸ் நீரிணை (Strait of Hormuz) மீதான கட்டுப்பாடாகும். இந்த நீரிணை வழியான கப்பல் போக்குவரத்து நிர்வாகத்தை புதிய கட்டத்திற்கு கொண்டு செல்லப்போவதாக மோஜ்தபா அறிவித்துள்ளார். இதன் மூலம் சர்வதேச எரிசக்தி விநியோகச் சங்கிலியில் கடுமையான அழுத்தத்தை ஏற்படுத்த ஈரான் திட்டமிட்டுள்ளது. “நாங்கள் நீரிணையின் கட்டுப்பாட்டைத் தீவிரப்படுத்துவோம்; தாக்குதல்களுக்கு ஈரான் தரும் பதில் மிகவும் வலிமையானதாக இருக்கும்” என்று அவர் எச்சரித்துள்ளதால், வளைகுடா பகுதியில் மீண்டும் போர் மேகங்கள் சூழத் தொடங்கியுள்ளன.

அதேவேளையில், சவுதி அரேபியா உள்ளிட்ட அண்டை வளைகுடா நாடுகளுக்கு மோஜ்தபா கமேனி ஒரு தந்திரோபாய அழைப்பை விடுத்துள்ளார். தெற்கு அண்டை நாடுகளின் எதிர்வினையை உன்னிப்பாகக் கவனித்து வருவதாகக் கூறிய அவர், இது ஈரானுடன் தங்களின் சகோதரத்துவத்தையும் நல்லுறவையும் வெளிப்படுத்த வேண்டிய தருணம் என்று குறிப்பிட்டுள்ளார். அமெரிக்காவின் பக்கம் நிற்கப்போகிறார்களா அல்லது பிராந்திய ஒருமைப்பாட்டிற்கு ஆதரவளிக்கப் போகிறார்களா என்ற கேள்வியை மறைமுகமாக முன்வைப்பதன் மூலம், வளைகுடா நாடுகளைத் தனது வியூகத்திற்குள் கொண்டு வர ஈரான் முயற்சி செய்கிறது. இந்த அரசியல் நகர்வுகள் மத்திய கிழக்கின் அதிகாரப் போட்டியை அடுத்த கட்டத்திற்கு நகர்த்தியுள்ளன.