“ஹார்முஸ் ஜலசந்தியை எந்த சக்தியாலும் பறிக்க முடியாது…” டொனால்ட் ட்ரம்பிற்கு ஈரான் பகிரங்க எச்சரிக்கை… மத்திய கிழக்கில் கொழுந்துவிட்டு எரியும் பதற்றம்…!!

அமெரிக்காவிற்கும் ஈரானுக்கும் இடையே ராணுவப் பதற்றங்கள் முன்னெப்போதும் இல்லாத வகையில் தீவிரமடைந்து வரும் நிலையில், முக்கிய கடல் வணிகப் பாதையான ஹார்முஸ் ஜலசந்தி விவகாரத்தில் டெஹ்ரான் நிர்வாகம் மிகக் கடுமையான நிலைப்பாட்டை எடுத்துள்ளது. ஈரானின் கதம் அல்-அன்பியா ராணுவ மையத்தின் செய்தித் தொடர்பாளர் மற்றும் நாடாளுமன்ற சபாநாயகர் முகமது பாகர் காலிபாஃப் ஆகியோர் வெளியிட்டுள்ள கூட்டு அறிவிப்பில், ஹார்முஸ் ஜலசந்தியில் அமெரிக்கா உள்ளிட்ட வெளிநாட்டுச் சக்திகளின் தலையீட்டைத் தங்களின் “சிவப்புக் கோடாகக்” கருதுவதாக எச்சரித்துள்ளனர். ஈரானிய உள்கட்டமைப்புகள் மீது வாஷிங்டன் தாக்குதல் நடத்த முயன்றால், அது ஒட்டுமொத்த மத்திய கிழக்குப் பிராந்தியத்தில் உள்ள பாதுகாப்பான தளங்களுக்கும் பேரழிவை ஏற்படுத்தும் என்றும், இரு நாடுகளுக்கு இடையேயான முந்தைய புரிந்துணர்வு ஒப்பந்தங்களை ஈரான் மதிக்காது என்றும் அவர்கள் திட்டவட்டமாகக் கூறியுள்ளனர்.

இதற்கிடையே, ஹார்முஸ் கடல் வழியே செல்லும் வணிகக் கப்பல்களின் பாதுகாப்பிற்கு அச்சுறுத்தலாக விளங்கிய ஈரானிய ராணுவத் தளங்களைக் குறிவைத்துத் தங்களின் மத்திய கட்டளைப் பிரிவு புதிய வான்வழித் தாக்குதல்களை நடத்தியுள்ளதாக அமெரிக்கா அதிகாரப்பூர்வமாக உறுதிப்படுத்தியுள்ளது. அமெரிக்க அதிபர் டொனால்ட் ட்ரம்பின் இந்த அடுத்தடுத்த ராணுவ நடவடிக்கைகளுக்குப் பதிலடி தரும் வகையில், தங்களின் இறையாண்மையைக் காக்க எந்தவொரு மோசமான சூழ்நிலையையும் எதிர்கொள்ளத் தயாராக இருப்பதாக ஈரான் பதிலடி கொடுத்துள்ளது. அமெரிக்காவின் தொடர் வான்வழித் தாக்குதல்களும், அதற்கு ஈரானின் கடுமையான மிரட்டல்களும் மத்திய கிழக்கு நாடுகளில் மீண்டும் ஒரு பெரும் போர் மூளும் அபாயத்தையும் பதற்றத்தையும் ஏற்படுத்தியுள்ளன.