“துரோகிகளை கொல்ல வந்தேன்.. இதைச் செய்வது எனது கடமை”… டிரம்ப் மீது துப்பாக்கிச்சூடு நடத்திவிட்டு கொலையாளி சொன்ன காரணம்…!

வெள்ளை மாளிகை செய்தியாளர்கள் சங்க இரவு விருந்தில் அதிபர் டொனால்ட் டிரம்ப் மற்றும் அவரது மனைவி மெலனியா டிரம்ப் பங்கேற்றிருந்தபோது நிகழ்ந்த துப்பாக்கிச்சூடு முயற்சி அமெரிக்காவையே உலுக்கியுள்ளது. வாஷிங்டன் ஹில்டன் ஹோட்டலில் 2,600-க்கும் மேற்பட்ட முக்கியப் பிரமுகர்கள் கூடியிருந்த வேளையில், கலிபோர்னியாவைச் சேர்ந்த கோல் ஆலன் என்ற நபர் ஆயுதங்களுடன் உள்ளே நுழைய முயன்றார். அங்கு பாதுகாப்பு பணியில் இருந்த சீக்ரெட் சர்வீஸ் அதிகாரி ஒருவரை நோக்கி அவர் சுட்டதில், புல்லட் ப்ரூப் ஜாக்கெட் அணிந்திருந்த காரணத்தால் அந்த அதிகாரி நல்வாய்ப்பாக உயிர் தப்பினார். உடனடியாக டிரம்ப் பாதுகாப்பாக வெளியேற்றப்பட்ட நிலையில், தாக்குதல் நடத்திய நபர் அதிகாரிகளால் மடக்கிப் பிடிக்கப்பட்டார்.

கைது செய்யப்பட்ட கோல் ஆலனிடமிருந்து ஒரு ஷாட்கன், கைத்துப்பாக்கி மற்றும் கத்திகள் பறிமுதல் செய்யப்பட்டன. விசாரணையில் அவர் வெளியிட்ட வாக்குமூலம் அதிர்ச்சியையும் விவாதத்தையும் கிளப்பியுள்ளது. தற்போதைய அமெரிக்கத் தலைமையை “துரோகிகள் மற்றும் குற்றவாளிகள்” என்று சாடியுள்ள அவர், தலைவர்களின் தவறான செயல்பாடுகள் ஒரு குடிமகனாகத் தன்னை பாதிப்பதாகவும், அவர்களின் குற்றங்கள் தன் கைகளில் படிவதைத் தடுக்கவே இந்தத் தாக்குதலை நடத்தியதாகவும் குறிப்பிட்டுள்ளார். உயரிய பதவியில் இருப்பவர்களைக் குறிவைப்பதே தனது நோக்கம் என்றும், பொதுமக்களையோ ஊழியர்களையோ காயப்படுத்தும் எண்ணம் தனக்கில்லை என்றும் அவர் தெரிவித்துள்ளார்.

மிகவும் கவலைக்குரிய விஷயமாக, அமெரிக்காவின் உயர்மட்டப் பாதுகாப்பு வளையத்தை அவர் கடுமையாக விமர்சித்துள்ளார். தன்னால் மிக எளிதாக ஆயுதங்களுடன் உள்ளே நுழைய முடிந்ததைச் சுட்டிக்காட்டிய அவர், சீக்ரெட் சர்வீஸ் அதிகாரிகளின் கவனக்குறைவைச் சாடியுள்ளார். தான் ஒரு வெளிநாட்டு உளவாளியாக இருந்திருந்தால் இதைவிடப் பெரிய அசம்பாவிதத்தை நிகழ்த்தியிருக்க முடியும் என்று அவர் கூறியிருப்பது, வெள்ளை மாளிகையின் பாதுகாப்பு ஏற்பாடுகள் குறித்த கேள்விகளை எழுப்பியுள்ளது. ஒரு பாதுகாப்பான சூழலில் இவ்வளவு பெரிய ஆயுதங்களுடன் ஒருவர் ஊடுருவியது பாதுகாப்பு அமைப்புகளுக்குப் பெரும் பின்னடைவாகக் கருதப்படுகிறது.

கோல் ஆலனின் அறிக்கையின் இறுதியில் காணப்பட்ட விசித்திரமான வரிகள் அவர் ஒரு ஆசிரியராக இருந்திருக்கலாம் என்ற சந்தேகத்தை ஏற்படுத்தியுள்ளது. தனது பெற்றோர் மற்றும் சக ஊழியர்களிடம் மன்னிப்புக் கேட்டதுடன், “குழந்தைகளே, பள்ளிக்கூடத்திற்குச் சென்று நன்றாகப் படியுங்கள்” என்று அவர் அறிவுறுத்தியுள்ளது வியப்பை ஏற்படுத்தியுள்ளது. இந்தத் தாக்குதல் முயற்சி தனக்கே குமட்டலைத் தருவதாகவும், இதை யாருக்கும் பரிந்துரைக்க மாட்டேன் என்றும் முரண்பாடான கருத்துக்களை அவர் முன்வைத்துள்ளார். இந்தச் சம்பவம் அமெரிக்க அரசியலில் பாதுகாப்பு மற்றும் தனிநபர் வன்முறை குறித்த புதிய விவாதங்களை மீண்டும் ஒருமுறைத் தூண்டியுள்ளது.