என் பாட்டக் கேட்டு பயணிகள் தூங்குறாங்க… ஆனா டிரைவர் முழிச்சிட்டு இருக்காரு… அதான் ஸ்பெஷல் – பெருமையாகப் பேசிய இளையராஜா!

சினிமாவில் தன்னுடைய 50 ஆவது ஆண்டை  விரைவில் தொடப் போகிறார் இசைஞானி இளையராஜா. தமிழ் சினிமாவின் தனிப்பெரும் சாதனையாளர்களில் ஒருவர் இளையராஜா. உலகளவில் அவர் அளவுக்கு அதிக படங்களில் இசையமைத்த இசையமைப்பாளர் இல்லை. இப்போதும் தன்னுடைய 82 ஆவது  வயதில் பிஸியாக பல படங்களுக்கு இசையமைத்து வருகிறார். இதுவரை அவர் 1500 படங்களுக்கு இசையமைத்துள்ளதாக சொல்லப்படுகிறது.

தமிழ் சினிமாவில் பல ஜாம்பவான் இசையமைப்பாளர்கள் உருவாகியுள்ளார்கள். ஆனால் அவர்களுக்கும் இளையராஜாவுக்கும் இடையே உள்ள பெரிய வித்தியாசமே பின்னணி இசையில் இளையராஜாவுக்கு நிகர் அவர் மட்டுமே. இளையராஜா 76 ஆம் ஆண்டு அன்னக்கிளி திரைப்படம் மூலம் அறிமுகமான நிலையில் ஐந்தே ஆண்டுகளில் தமிழ் சினிமாவில் நம்பர் 1 இசையமைப்பாளராக ஆனார்.

அதன் பிறகு மிடாஸ் மன்னன் போல அவர் தொட்டதெல்லாம் தங்கமாக மாறின. அந்தளவுக்கு அவர் பாடல்கள் அடுத்த சில தசாப்தங்களுக்கு தமிழர்களை மயக்கியது. அதன் பின்னர் 1992 ஆம் ஆண்டு ரஹ்மானின் வருகைதான் அதன் பிறகு தமிழ் சினிமா இசையின் போக்கை மாற்றியது.

ஆனால் இன்றளவும் இளையராஜாவின் ஆரம்பகால பாடல்களைக் கேட்கும் ரசிகர்கூட்டம் கோடிக்கணக்கில் தமிழகத்தில் உள்ளது. அதுவும் கார் பயணம், பஸ் பயணம் என்றாலே இளையராஜா பாடல்தான் என்ற எழுதப்படாத விதி உள்ளது.

இதுபற்றி இயக்குனரும் நடிகருமான பாரதிகண்ணன் ஒரு சுவாரஸ்யமானத் தகவலைப் பகிர்ந்துள்ளார். அதில் “நான் ஒருமுறை இளையராஜா சாரை சந்திக்க சென்றபோது அவரிடம் உங்கள் பழைய பாடல்கள்தான் இன்றுவரை பேருந்து பயணங்களில் ஒலிக்கிறது என்றேன். அதற்கு அவர் “அதில் ஒரு ஸ்பெஷலான விஷயம் உள்ளது. என் பாட்டைக் கேட்டு பயணிகள் எல்லாம் தூங்குகிறார்கள். அனால் அதே பாடலைக் கேட்டுக்கொண்டுதான் டிரைவர் தூங்காமல் பேருந்தை ஓட்டுகிறார்” எனக் கூறினார். எனக்கு அப்போதுதான் அந்த விஷயம் ஆச்சர்யத்தை ஏற்படுத்தியது” எனக் கூறியுள்ளார்.