இன்றைக்கு உலகில் இருக்கும் இசையமைப்பாளர்களில் வயதிலும் அனுபவத்திலும் மூத்தவராக இருக்கிறார் இளையராஜா. இப்போதும் தன்னுடைய 82 ஆவது வயதில் பிஸியாக பல படங்களுக்கு இசையமைத்து வருகிறார். இதுவரை அவர் 1200 படங்களுக்கு இசையமைத்துள்ளதாக சொல்லப்படுகிறது. இது தவிர இசைக் கச்சேரிகளை உலகம் முழுவதும் நடத்தியுள்ளார்.
தமிழ் சினிமாவில் பல ஜாம்பவான் இசையமைப்பாளர்கள் உருவாகியுள்ளார்கள். ஆனால் அவர்களுக்கும் இளையராஜாவுக்கும் இடையே உள்ள பெரிய வித்தியாசமே பின்னணி இசையில் இளையராஜாவுக்கு நிகர் அவர் மட்டுமே. அவரின் வருகைக்குப் பிறகே தமிழ் சினிமாவில் பின்னணி இசையை இயக்குனர்கள் உணர ஆரம்பித்தார்கள் என்றால் அது மிகையாகாது.
இளையராஜா மிகவும் மென்மையான மற்றும் ஆன்மீக ரீதியான இசையைதான் அதிகமாக விரும்புவார். ஆனால் அவர் இசையமைத்ததில் பெரும்பாலானப் படங்கள் எல்லாம் கமர்ஷியல் படங்கள்தான். ஆனால் அதிலும் தன்னுடைய முத்திரையைப் பதித்தவர்.
இந்நிலையில் படத்துக்காக இயக்குனர்கள் சொன்ன சூழலுக்காகதானே இளையராஜா ட்யூன் போட்டு இசையமைத்து பாடல்களை உருவாக்கினார் என்ற விமர்சனமும் அவர் மேல் எழுந்தது உண்டு. அதற்கு சமீபத்தில் இளையராஜா அளித்த தகவல் பதிலாக அமையக் கூடும்.
அது என்னவென்றால் “இளையராஜா கமல்ஹாசனின் ராஜபார்வை படத்துக்கு இசையமைக்க ஒப்பந்தமாகியுள்ளார். அப்போது மறு நாள் பூஜைக்கு பாடல் தேவைப்பட்டுள்ளது. ஆனால் அப்போது படத்தின் கதையே தயாராகவில்லையாம். அது கூட பரவாயில்லை, ஆனால் என்ன சூழலுக்கு பாடல் வேண்டும் என்பது கூட தெரியவில்லையாம். இயக்குனர் டூயட் பாடல் வேண்டும் என்று சொல்லிவிட்டாராம். அப்படிப் பட்ட சூழலில்தான் இளையராஜா இசையமைக்க, கவிஞர் கண்ணதாசன் அழகே அழகே பாடலை எழுதினாராம். அந்த பாடல் இன்றளவும் கொண்டாடப்படும் ஒன்றாக உள்ளது. அந்த பாடலில் இடம்பெற்ற ராஜபார்வை என்ற வார்த்தைதான் படத்துக்கே டைட்டிலாக ஆனது.