“காரை ஆற்றில் பாய்ந்து தப்பிய கணவன்… தண்ணீரில் மூழ்கிய மனைவி…! பஞ்சாப்பில் அரங்கேறிய திட்டமிட்ட கொலை..!”

பஞ்சாப் மாநிலம் பாட்டியாலாவில், ஹேப்பி சிங் என்ற ராணுவ வீரர் தனது மனைவி ரமண்தீப் கவுரை திட்டமிட்டு காரோடு பக்ரா கால்வாயில் குதித்து கொலை செய்துள்ளார். ஹேப்பி சிங்கிற்கு நன்றாக நீந்தத் தெரியும் என்பதால், கார் தண்ணீரில் மூழ்கியவுடன் அவர் கதவைத் திறந்து நீந்தி தப்பித்துவிட்டார். ஆனால், அவரது மனைவி காரில் சிக்கி பரிதாபமாக நீரில் மூழ்கி உயிரிழந்தார்.

இறந்த ரமண்தீப் கவுரின் அண்ணன் குர்ஜீத் சிங் அளித்த வாக்குமூலத்தின்படி, ஹேப்பி சிங்கும் ரமண்தீப்பும் நீண்ட நாட்களாக காதலித்து, 2024 ஆம் ஆண்டில் பெற்றோரின் சம்மதமின்றி காதல் திருமணம் செய்து கொண்டனர். ஆனால், ஹேப்பி சிங்கின் பெற்றோர் இந்த திருமணத்தை ஏற்க மறுத்ததால், இவர்களுக்குள் தொடர்ந்து குடும்பத் தகராறு ஏற்பட்டு வந்தது. சம்பவத்தன்று இரவு இவர்களுக்குள் ஏற்பட்ட கடுமையான சண்டையைத் தொடர்ந்து, ஹேப்பி சிங் மனைவியைக் கட்டாயப்படுத்தி காரில் ஏற்றிச் சென்று, பசியானா பாலம் அருகே ஓடும் ஆழமான பக்ரா கால்வாயில் காரை அதிவேகமாகச் செலுத்தி இந்த கொடூரச் செயலை அரங்கேற்றியுள்ளார்.

மறுநாள் காலையில் கால்வாயில் கார் மிதப்பதைக் கண்ட உள்ளூர் இளைஞர் ஒருவர் போலீசாருக்குத் தகவல் கொடுத்துள்ளார். சம்பவ இடத்திற்கு வந்த போலீசார் மற்றும் முங்குவழிகாரர்கள் காரை மீட்டு, உள்ளே இருந்த ரமண்தீப் கவுரின் உடலைக் கைப்பற்றினர். பெண்ணின் குடும்பத்தினர் அளித்த புகாரின் பேரில், ராணுவ வீரர் ஹேப்பி சிங் மீது கொலை வழக்குப் பதிவு செய்யப்பட்டு அவர் கைது செய்யப்பட்டுள்ளார்.