நெஞ்சை உலுக்கும் கொடூரம்..! 8 மாதக் கர்ப்பிணி மனைவியின் வயிற்றில் உதைத்த கணவன்… கருவிலேயே துடிதுடித்து இறந்த குழந்தை…! உத்தராகண்டில் பரபரப்பு…!!

உத்தரகாண்ட் மாநிலம் டேராடூனில் கணவனால் மிகக் கொடூரமாகத் தாக்கப்பட்ட 8 மாதக் கர்ப்பிணிப் பெண்ணின் வயிற்றில் இருந்த குழந்தை உயிரிழந்த அதிர்ச்சிச் சம்பவம் நடந்துள்ளது. பாப்லு என்ற நபர், தனது மனைவி சீமாவுடன் ஏற்பட்ட தகராறில், அவரின் வயிற்றில் காலால் உதைத்தும், மரக்கட்டையால் அடித்தும் கொடூரத் தாக்குதலில் ஈடுபட்டுள்ளார். இந்தத் தாக்குதலின் வீரியத்தால், சீமாவின் வயிற்றில் வளர்ந்து வந்த 8 மாதக் கரு அங்கேயே உயிரிழந்தது.

இந்தக் கொடூரம் வெளிச்சத்திற்கு வர சீமாவின் தந்தை ஷேர் சிங் தான் காரணமாக இருந்துள்ளார். மகளைப் பார்க்க அவர் வீட்டிற்குச் சென்றபோது, கணவர் பாப்லு அவரை உள்ளே விடாமல் தடுத்துள்ளார். இதனால் சந்தேகமடைந்த தந்தை உடனடியாகக் காவல் துறைக்குத் தகவல் கொடுத்தார். விரைந்து வந்த போலீசார், படுகாயமடைந்த பெண்ணை மீட்டு மருத்துவமனைக்கு அனுப்பி வைத்தனர். அங்கு மருத்துவர்கள் தீவிர சிகிச்சை மற்றும் அறுவை சிகிச்சை மூலம், உயிரிழந்த குழந்தையை வெளியே எடுத்தனர். தற்போது சீமா ஆபத்தான நிலையில் மருத்துவமனையில் சிகிச்சை பெற்று வருகிறார்.

பாதிக்கப்பட்ட பெண்ணின் குடும்பத்தினர், பாப்லு தனது மனைவியை முன்னதாகக் கட்டாயப்படுத்தி பாலினக் கண்டறிதல் சோதனைக்கு அழைத்துச் சென்றதாகவும், வயிற்றில் இருப்பது பெண் குழந்தை என்று தெரிந்ததால் தான் இந்தத் தாக்குதலை நடத்தியதாகவும் குற்றம் சாட்டுகின்றனர். ஆனால், காவல் துறையின் முதற்கட்ட விசாரணையில், சீமாவின் பெயரில் இருந்த ஒரு நிலத்தை அவர் கணவருக்குத் தெரியாமல் விற்று, அந்தப் பணத்தைத் தன் பெற்றோருக்குக் கொடுத்ததால் ஏற்பட்ட குடும்பத் தகராறு தான் இதற்குக் காரணம் என்று கூறப்படுகிறது. தற்போது குற்றவாளியான கணவர் பாப்லுவை போலீசார் கைது செய்து, பாரதிய நியாய சன்ஹிதா சட்டப்பிரிவுகளின் கீழ் வழக்குப் பதிவு செய்து விசாரித்து வருகின்றனர்.