ஜனகாம மாவட்டம் ஓபுலகேசவாபுரம் கிராமத்தைச் சேர்ந்த மகேந்தர் ரெட்டி மற்றும் மாதவி தம்பதியினர் காதலித்து திருமணம் செய்து கொண்டவர்கள். இவர்களுக்கு இரண்டு குழந்தைகள் உள்ளனர். இந்நிலையில், மகேந்தர் ரெட்டிக்கு வேறொரு பெண்ணுடன் கள்ளத்தொடர்பு இருந்துள்ளது. இந்த விவகாரம் மாதவிக்கு தெரியவரவே, அவர் தனது கணவரைக் கண்டித்து நியாயம் கேட்டுள்ளார்.
இதனால் ஆத்திரமடைந்த மகேந்தர் ரெட்டி, மனைவி மாதவியை கொடூரமாகத் தாக்கி பலத்த காயப்படுத்தியுள்ளார். அத்துடன் நிற்காமல், வீட்டிலிருந்த தனது இரண்டு குழந்தைகளையும் பலவந்தமாக கடத்திச் சென்றுள்ளார். காயம் அடைந்த மாதவி, கணவனின் அத்துமீறலால் செய்வதறியாது தவித்துள்ளார்.
இச்சம்பவத்தைத் தொடர்ந்து, பாதிக்கப்பட்ட மாதவி காவல்துறை அதிகாரிகளைச் சந்தித்து தஞ்சம் அடைந்தார். இப்புகாரின் பேரில் வழக்குப்பதிவு செய்த காவல்துறையினர், தலைமறைவாக உள்ள மகேந்தர் ரெட்டியைத் தேடி, குழந்தைகளை மீட்க தீவிர விசாரணை மேற்கொண்டு வருகின்றனர்.