“எங்களை லவ் பண்ணிட்டு மோடிய கல்யாணம் பண்ணிக்கிட்டாரே!” – கார்கேவின் அதிரடி கிண்டல்.. குலுங்கிச் சிரித்த பிரதமர் மோடி!

மாநிலங்களவையில் முன்னாள் பிரதமர் எச்.டி. தேவெகவுடா உள்ளிட்ட 37 உறுப்பினர்களின் பதவிக்காலம் முடிவடைவதைத் தொடர்ந்து, அவர்களை வாழ்த்தி வழியனுப்பும் நிகழ்ச்சி உணர்ச்சிகரமாகவும் அதேசமயம் கலகலப்பாகவும் நடைபெற்றது. இந்த நிகழ்வில் பிரதமர் நரேந்திர மோடி மற்றும் எதிர்க்கட்சித் தலைவர் மல்லிகார்ஜுன கார்கே ஆகியோர் ஆற்றிய உரைகள், அரசியல் எல்லைகளைத் தாண்டி அவையில் ஒரு நெகிழ்ச்சியான சூழலை உருவாக்கியது. குறிப்பாக, கர்நாடக அரசியலில் நீண்டகாலமாகத் தங்களுக்குள் இருக்கும் நட்பையும் பிணக்கையும் கார்கே நகைச்சுவையுடன் வெளிப்படுத்தியது அனைவரையும் கவர்ந்தது.

தேவெகவுடா குறித்துப் பேசிய மல்லிகார்ஜுன கார்கே, “தேவெகவுடாவை எனக்கு 54 ஆண்டுகளுக்கும் மேலாகத் தெரியும். அவருடன் நான் நீண்ட காலம் இணைந்து பணியாற்றியுள்ளேன். ஆனால், பிறகு அவருக்கு என்ன ஆனது என்று தெரியவில்லை” என்று பீடிகையுடன் தொடங்கினார். தொடர்ந்து அவர், “அவர் நேசித்தது எங்களை (காங்கிரஸ்), ஆனால் திருமணம் செய்தது மோடியை (பாஜக கூட்டணி)” என்று கிண்டலாகக் குறிப்பிட்டதும், பிரதமர் மோடி உட்பட அவையில் இருந்த அனைத்து எம்.பி.க்களும் விழுந்து விழுந்து சிரித்தனர். அரசியலில் ஈடுபடுபவர்கள் நாட்டுக்குச் சேவை செய்ய வேண்டும் என்ற உறுதியுடன் இருப்பதால், அவர்களுக்கு ஓய்வே இல்லை என்றும் கார்கே நெகிழ்ச்சியுடன் குறிப்பிட்டார்.

இதற்குப் பதிலளித்துப் பேசிய பிரதமர் மோடி, சமீபகாலமாக அவையில் நகைச்சுவை மற்றும் ஆரோக்கியமான கிண்டல்கள் குறைந்துவிட்டதைச் சுட்டிக்காட்டினார். அவைக்குப் புதிதாகத் தேர்வு செய்யப்பட்டுள்ள இளம் உறுப்பினர்கள், தேவெகவுடா, கார்கே மற்றும் சரத் பவார் போன்ற மூத்த தலைவர்களிடம் இருந்து நாடாளுமன்ற ஜனநாயகத்தின் மாண்புகளையும், விவாதிக்கும் முறைகளையும் கற்றுக் கொள்ள வேண்டும் என்று அவர் அறிவுறுத்தினார். அரசியல் ரீதியாகக் கடுமையான விமர்சனங்கள் இருந்தாலும், தனிப்பட்ட முறையில் தலைவர்கள் காட்டும் பரஸ்பர மரியாதை இளைய தலைமுறைக்கு ஒரு பாடம் என்றார்.

இந்த வழியனுப்பு விழா, வெறும் பதவி விலகல் நிகழ்வாக மட்டும் அமையாமல், இந்திய ஜனநாயகத்தின் முதிர்ச்சியைப் பறைசாற்றும் ஒரு தருணமாக அமைந்தது. வெவ்வேறு சித்தாந்தங்களைக் கொண்ட தலைவர்கள் ஒரே இடத்தில் கூடி, ஒருவரையொருவர் பாராட்டியும் கிண்டல் செய்தும் பேசியது சமூக வலைதளங்களில் வைரலாகி வருகிறது. மூத்த உறுப்பினர்களின் அனுபவங்கள் அவைக்குப் பெரும் பலமாக இருந்ததை இந்த உரையாடல்கள் உறுதிப்படுத்தின.