“அடேங்கப்பா.. இவ்வளவு பெரிய அந்தர் பல்டியா?… இயேசுவாகக் காட்டிவிட்டு இப்போது ‘டாக்டர்’… டிரம்பின் விளக்கம் தான் இப்போது செம வைரல்”….!!!

ஈரான் மீதான போரை நிறுத்துமாறு வலியுறுத்திய போப் ஆண்டவர் லியோவை, அமெரிக்க அதிபர் டிரம்ப் கடுமையாக விமர்சித்தார். போப் ஆண்டவர் அரசியலில் ஈடுபடுவதைத் தவிர்த்து, தனது ஆன்மீகப் பணிகளில் மட்டும் கவனம் செலுத்த வேண்டும் என்று டிரம்ப் அறிவுறுத்தினார். இந்த மோதல் கத்தோலிக்க சமூகத்தினரிடையே பெரும் பரபரப்பை ஏற்படுத்திய நிலையில், இருவருக்கும் இடையிலான கருத்து வேறுபாடு சர்வதேச அளவில் பேசுபொருளானது.

இதற்கிடையில், டிரம்ப் தன்னை இயேசுவைப் போல சித்தரிக்கும் செயற்கை நுண்ணறிவு (AI) புகைப்படத்தை சமூக வலைதளத்தில் வெளியிட்டார். அந்தப் படத்தில் இயேசுவின் தோற்றத்தில் இருந்த டிரம்ப், அற்புதங்களைச் செய்வது போலவும், அவருக்குப் பின்னால் அமெரிக்கக் கொடி மற்றும் ராணுவ விமானங்கள் இருப்பது போலவும் சித்தரிக்கப்பட்டிருந்தது. தன்னைத் தெய்வமாக உருவகப்படுத்திய டிரம்பின் இந்தச் செயலுக்கு அமெரிக்க கத்தோலிக்கத் தலைவர்கள் மற்றும் பல்வேறு தரப்பினரிடமிருந்து கடும் கண்டனங்கள் எழுந்தன.

எதிர்ப்புகள் வலுத்ததைத் தொடர்ந்து, சர்ச்சைக்குரிய அந்தப் புகைப்படத்தை டிரம்ப் தனது பக்கத்திலிருந்து நீக்கினார். இது குறித்து விளக்கம் அளித்த அவர், அந்தப் படம் தன்னை இயேசுவாகக் காட்டவில்லை என்றும், ஒரு மருத்துவராகவே தன்னைக் கருதி அதைப் பகிர்ந்ததாகவும் குறிப்பிட்டார். மேலும், அந்தப் படம் செஞ்சிலுவைச் சங்கம் மற்றும் அதன் பணியாளர்களுடன் தொடர்புடையது என்றும், மக்கள் அதற்குத் தவறான அர்த்தம் கற்பித்துவிட்டதாகவும் கூறி தனது செயலை நியாயப்படுத்தினார்.