பனிப்பெண் டூ மந்திரி!.. மேற்கு வங்கத்தை அதிரவைத்த ‘கலீதா மாஜி’.. இந்தியாவையே உலுக்கிய நிஜ ‘நெற்றிக்கண்’ கதை..!!

மேற்குவங்கத்தில் முதல்வர் சுவேந்து அதிகாரி தலைமையிலான அமைச்சரவை விரிவாக்கத்தின் போது, ஆஸ்கிராம் சட்டசபை தொகுதியில் பாஜக சார்பில் போட்டியிட்டு வெற்றி பெற்ற 37 வயதான கலிதா மாஜி என்ற எளிய பெண்மணி புதிய அமைச்சராகப் பொறுப்பேற்றுள்ளார். கடந்த சட்டமன்றத் தேர்தலில் தன்னை எதிர்த்துப் போட்டியிட்ட திரிணமுல் காங்கிரஸ் வேட்பாளரை 12,535 வாக்குகள் வித்தியாசத்தில் தோற்கடித்த இவருக்கு, தன் தொகுதி மக்கள் மத்தியில் மிகுந்த செல்வாக்கு உள்ளது.

2006-ம் ஆண்டு பிளம்பர் ஒருவரைத் திருமணம் செய்து கொண்ட கலிதா மாஜி, கடந்த பல ஆண்டுகளாகக் குஸ்காரா பகுதியில் மாதத்திற்கு 4,000 ரூபாய் சம்பளத்தில் வீட்டு வேலைக்காரியாகப் பணிபுரிந்து, சமையல் மற்றும் தூய்மைப் பணிகளைச் செய்து வந்துள்ளார். வறுமையான சூழலிலும் தனது பணிகளைச் செய்துகொண்டே பாஜகவின் அனைத்துக் கட்சி நிகழ்ச்சிகளிலும் தீவிரமாகப் பங்கேற்று வந்த இவர், பிரதமர் மோடியே தனது அரசியல் பயணத்திற்குப் பெரும் உத்வேகமாக இருந்ததாக நெகிழ்ச்சியுடன் தெரிவித்துள்ளார்.

அமைச்சராகப் பதவியேற்ற பின் பேசிய கலிதா மாஜி, பின்தங்கிய மக்களுக்குத் தண்ணீர்ப் பற்றாக்குறையைப் போக்குவது மற்றும் தனது தொகுதியில் ஒரு புதிய மருத்துவமனையைக் கட்டுவதே தனது முதல் பணி என்று கூறியுள்ளார். மேலும், பள்ளி, கல்லூரி மாணவிகள் காடுகளைக் கடந்து செல்லும்போது சந்திக்கும் பிரச்சினைகளுக்குத் தீர்வுகண்டு பெண்கள் பாதுகாப்பை உறுதிசெய்வதோடு, ஒரு சாதாரண வீட்டுப் பணியாளராலும் அரசியல்வாதியாக முடியும் என்பதை நிரூபித்துள்ள தனது பாஜக அரசு, தன்னைப்போன்ற ஏழை எளிய மக்களின் முன்னேற்றத்திற்காகவும், ஊழலற்ற ஆட்சிக்காகவும் பாடுபடும் என உறுதியளித்துள்ளார்.