ஜார்க்கண்ட் மாநிலம் தியோகரில் உள்ள நந்தன் பஹார் பகுதியில், பாரத ஸ்டேட் வங்கியின் ஏடிஎம் மையத்தில் துணிகரக் கொள்ளை சம்பவம் நிகழ்ந்துள்ளது. அங்கு வந்த நான்கு பேர் கொண்ட மர்ம கும்பல், மையத்தின் ஷட்டரை உடைத்து உள்ளே புகுந்துள்ளது. தொடர்ந்து, ஏடிஎம் இயந்திரத்தைக் கயிற்றால் கட்டி காரில் பிணைத்து பலவந்தமாகப் பெயர்த்து எடுத்ததோடு, சாலையில் சுமார் 500 மீட்டர் தூரம் வரை அதனைத் தரதரவென இழுத்துச் சென்றுள்ளனர்.
அதன் பிறகு, அந்த இயந்திரத்தைத் தாங்கள் கொண்டு வந்த வாகனத்தில் ஏற்றிக்கொண்டு அக்கும்பல் அங்கிருந்து மின்னல் வேகத்தில் தப்பியோடியுள்ளது. தகவலறிந்து சம்பவ இடத்திற்கு வந்த காவல்துறையினர் வழக்குப் பதிவு செய்து தீவிர விசாரணை மேற்கொண்டு வருகின்றனர். தலைமறைவான கொள்ளையர்களை அடையாளம் கண்டு கைது செய்ய அப்பகுதியிலுள்ள சிசிடிவி கண்காணிப்புக் கேமரா பதிவுகளை அதிகாரிகள் தீவிரமாக ஆய்வு செய்து வருகின்றனர்.