அமெரிக்க பொருளாதாரம் இனி அவ்வளவுதானா..? ஜகா வாங்கும் வெளிநாட்டு முதலீட்டாளர்கள்.. வெளியான அறிக்கையின் பின்னணி என்ன..?

உலகின் மிகப்பெரிய பொருளாதார நாடான அமெரிக்கா தற்போது கடுமையான நிதி நெருக்கடியை எதிர்கொண்டுள்ளது. அமெரிக்க மத்திய வங்கியான ஃபெடரல் ரிசர்வில் வெளிநாட்டு நிறுவனங்கள், மத்திய வங்கிகள் மற்றும் அரசுகள் வைத்துள்ள அமெரிக்க அரசுப் பத்திரங்களின் மதிப்பு 2.68 டிரில்லியன் டாலராகக் குறைந்துள்ளது. இது கடந்த 2012ஆம் ஆண்டுக்குப் பிறகு, அதாவது 13 ஆண்டுகளில் பதிவான மிகக் குறைந்த அளவாகும். கடந்த 2025 மார்ச் மாதத்தில் இருந்து மட்டும் சுமார் 265 பில்லியன் டாலர் முதலீடுகள் அமெரிக்க பத்திர சந்தையில் இருந்து திரும்பப் பெறப்பட்டுள்ளது ஒட்டுமொத்த முதலீட்டுச் சந்தையிலும் பெரும் அச்சத்தை ஏற்படுத்தியுள்ளது.

அமெரிக்கா மற்றும் ஈரான் இடையே தீவிரமடைந்து வரும் போர்ச் சூழல் காரணமாக, சர்வதேச சந்தையில் கச்சா எண்ணெய்யின் விலை கணிசமாக உயர்ந்துள்ளது. எண்ணெய் உற்பத்தி நாடுகள் அனைத்தும் டாலரிலேயே வர்த்தகம் செய்வதால், கச்சா எண்ணெய் விலை உயர்வால் உலக நாடுகளின் உள்நாட்டு நாணய மதிப்பு பலவீனமடையத் தொடங்கியது. இதனால், தங்களது சொந்த நாணய மதிப்பைத் தக்கவைத்துக் கொள்ள உலக நாடுகளின் மத்திய வங்கிகள் தங்களின் பாதுகாப்பில் இருந்த அமெரிக்க அரசுப் பத்திரங்களை விற்று, அமெரிக்க டாலர்களைத் திரட்ட வேண்டிய கட்டாயத்திற்குத் தள்ளப்பட்டன. குறிப்பாக, ஈரான் போர் தொடங்கிய கடந்த மூன்று மாதங்களில் மட்டும் சுமார் 120 பில்லியன் டாலர் மதிப்பிலான பத்திரங்கள் விற்கப்பட்டுள்ளன.

வெளிநாட்டு முதலீட்டாளர்கள் ஒருபுறம் பாதுகாப்பான அரசுப் பத்திரங்களை விற்றாலும், மறுபுறம் அமெரிக்கப் பங்குச் சந்தையில், குறிப்பாக எண்ணெய் மற்றும் பாதுகாப்புத் துறைப் பங்குகளில் தொடர்ந்து முதலீடு செய்து வருகின்றனர். இது “பத்திரங்களை விற்று அமெரிக்காவை வாங்குவது” என்ற புதிய போக்கைக் காட்டுகிறது. தற்போதைக்கு அமெரிக்கப் பொருளாதாரம் வலுவாக இருந்தாலும், அதன் அதீத கடன், வட்டிச் சுமை மற்றும் வெளிநாட்டு முதலீட்டாளர்களின் இந்த ஜகா வாங்கும் போக்கு நீண்ட காலத்தில் உலக நிதி அமைப்பில் பெரும் தாக்கத்தை ஏற்படுத்தும். மேலும், அமெரிக்காவில் பணவீக்கம் அதிகரித்து வட்டி விகிதங்கள் உயர்த்தப்பட்டால், அது ஒட்டுமொத்த பொருளாதாரச் சரிவுக்கு வழிவகுக்கும் என நிபுணர்கள் எச்சரிக்கின்றனர்.