குடும்பத்தோடு இரவு உணவு… விடிந்ததும் உயிரிழந்த 5 வயது குழந்தை… அடுத்தடுத்து காத்திருந்த பேரதிர்ச்சி…!

ஓசூர் அருகே விஷம் கலந்த உணவை சாப்பிட்ட ஒரே குடும்பத்தை சேர்ந்த ஐந்து பேரில் 5 வயது குழந்தை உயிரிழந்த சம்பவம் சோகத்தை ஏற்படுத்தியுள்ளது. கிருஷ்ணகிரி மாவட்டம் ஓசூர் அடுத்த கிராமத்தில் பெங்களூரை சேர்ந்த ஜெய் பிரகாஷ் என்பவருக்கு சொந்தமான கோழி பண்ணையில் பீகாரை சேர்ந்தவர்கள் ஒரே குடும்பத்தினர் வேலை செய்து வந்துள்ளனர். இதனிடையே நேற்று இரவு குடும்பத்தில் தகராறு ஏற்பட்ட நிலையில் அனைவரும் உணவு சாப்பிட்டு உள்ளனர். அப்போது மயக்கம் ஏற்பட்டதால் அருகே உள்ள ஆரம்ப சுகாதார நிலையத்தில் சிகிச்சை பெற்றனர்.

தொடர்ந்து இன்று காலை மயக்கத்துடன் வாயில் நுரை தள்ளியவாறு ஓசூர் அரசு மருத்துவமனைக்கு சிகிச்சைக்காக அழைத்து வரப்பட்ட நிலையில் 5 வயது குழந்தை அயன் என்பவன் மட்டும் உயிரிழந்துள்ளான். மயக்க நிலையில் இருந்த ரிஸ்வான் (40), மனைவி சல்மா (35), முஷாரத் (17), சாகில்(15) ஆகியோருக்கு ஓசூர் அரசு மருத்துவமனையில் தீவிர சிகிச்சை அளிக்கப்பட்டு வருகின்றது.

போலீசார் நடத்திய முதல் கட்ட விசாரணையில் உணவு சாப்பிட்டதில் மயக்கம் ஏற்பட்டதாக சிறுவன் கூறிய நிலையில் உணவில் விஷம் கலக்கப்பட்டதாகவும் தெரிகிறது. உணவில் விஷம் கலக்கப்பட்டது தொடர்பாக போலீசார் விசாரணை நடத்தி வருகிறார்கள். குடும்பத்தில் தகராறு நடந்ததால் விஷம் கலந்து சாப்பிட்டு உயிரை மாய்த்துக் கொள்ள முயற்சி செய்தார்களா என்ற கோணத்தில் தற்போது போலீசார் விசாரணை நடத்தி வருகிறார்கள்.