ஐயோ கடவுளே… செல்போன் பழுதுபார்க்க சென்ற… இடத்தில் நேர்ந்த விபத்து… பேருந்து மோதி ஐடி பெண் ஊழியர் துடிதுடித்து பலி… நெஞ்சை பதறவைக்கும் சோகம்…!

ஹைதராபாத்தின் அமீர்பேட்டை பகுதிக்கு அருகே ஒரு சோகமான சாலை விபத்து நிகழ்ந்துள்ளது. ஸ்ரீநகர் காலனியில் உள்ள ஒரு தனியார் நிறுவனத்தில் பணியாற்றி வந்த ஹேமதுர்கா (26) என்ற இளம் பெண், தனது மொபைல் போனை பழுதுபார்ப்பதற்காக அலுவலகத்தில் அனுமதி பெற்று ரேபிடோ (Rapido) பைக் மூலம் புறப்பட்டுள்ளார். பிக் பஜாரின் பின்புற வாயில் அருகே சென்று கொண்டிருந்த போது, எதிர்பாராதவிதமாக இந்த அசம்பாவிதம் நிகழ்ந்துள்ளது.

சாலையில் சென்று கொண்டிருந்த அரசுப் போக்குவரத்துக் கழக பேருந்து ஒன்று, ஹேமதுர்கா பயணித்த ரேபிடோ பைக் மீது பலமாக மோதியது. இந்த விபத்தின் கோரமான தாக்கத்தால் பைக்கில் இருந்து தூக்கி வீசப்பட்ட ஹேமதுர்கா, தலை மற்றும் உடலில் பலத்த காயமடைந்து சம்பவ இடத்திலேயே பரிதாபமாக உயிரிழந்தார். அவருடன் பைக்கை ஓட்டிச் சென்ற ரேபிடோ ஓட்டுநரும் காயங்களுக்கு உள்ளானார்.

விபத்து குறித்து தகவலறிந்த காவல்துறையினர் உடனடியாக சம்பவ இடத்திற்கு விரைந்து வந்தனர். காயமடைந்த ரேபிடோ ஓட்டுநரை மீட்டு சிகிச்சைக்காக அருகில் உள்ள மருத்துவமனைக்கு அனுப்பி வைத்தனர். மேலும், உயிரிழந்த ஹேமதுர்காவின் உடலைக் கைப்பற்றி பிரேதப் பரிசோதனைக்காக அனுப்பி வைத்துள்ள காவல்துறையினர், விபத்து தொடர்பாக வழக்குப்பதிவு செய்து விசாரணை நடத்தி வருகின்றனர்.