“2 குழந்தைகளுக்கு தாய், வீடியோ காலில் கள்ளக்காதலன்”… கதறித் துடித்த மருமகள்… ஆத்திரத்தில் சித்தப்பா செய்த பயங்கரம்….!

கன்னியாகுமரி மாவட்டம் இரணியல் அருகே, திருமணத்திற்கு மீறிய உறவால் இளம்பெண் ஒருவர் அவரது சித்தப்பாவால் கொடூரமாகக் கொலை செய்யப்பட்ட சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது. தலக்குளம் பகுதியைச் சேர்ந்த சுபிதா (28) என்பவருக்கும் அருண் பிரசாத் என்பவருக்கும் பத்து ஆண்டுகளுக்கு முன்பு திருமணம் நடைபெற்று, இரண்டு ஆண் குழந்தைகள் உள்ளனர். கணவர் வெளியூரில் தங்கி வேலை பார்த்து வந்த நிலையில், இன்ஸ்டாகிராம் மூலம் அறிமுகமான அனிஸ் என்ற இளைஞருடன் சுபிதாவிற்கு பழக்கம் ஏற்பட்டு, அது நாளடைவில் கள்ளக்காதலாக மாறியுள்ளது.

இந்த சட்டவிரோத உறவு குறித்து கணவர் கண்டித்ததால், சுபிதா தனது குழந்தைகளுடன் தாய் வீட்டிற்குச் சென்று வசித்து வந்துள்ளார். அங்கேயும் தனது காதலன் அனிஸுடன் ரகசியமாகத் தொடர்பைத் தொடர்ந்ததுடன், அடிக்கடி வீடியோ காலில் பேசி வந்துள்ளார். சுபிதாவின் இத்தகைய நடத்தையை அவரது சித்தப்பாவான ராஜேஷ் என்பவர் பலமுறை கண்டித்துள்ளார். குடும்பப் பெயருக்குக் களங்கம் விளைவிப்பதாகக் கூறி எச்சரித்தும் சுபிதா அதனைப் பொருட்படுத்தவில்லை என்று கூறப்படுகிறது.

சம்பவத்தன்று இரவு, சுபிதா தனது காதலன் அனிஸுடன் வீடியோ காலில் பேசிக்கொண்டிருந்ததைப் பார்த்த ராஜேஷ் ஆத்திரமடைந்துள்ளார். வாக்குவாதம் முற்றிய நிலையில், அருகில் இருந்த இரும்பு கம்பியால் சுபிதாவைத் தாக்கியுள்ளார். தனது காதலி தாக்கப்படுவதை வீடியோ காலில் பார்த்த அனிஸ், உடனடியாக அங்கு வந்து ராஜேஷுடன் மோதலில் ஈடுபட்டுள்ளார். ஆனால், அக்கம் பக்கத்தினர் திரண்டதால் அனிஸ் அங்கிருந்து தப்பியோடிவிட்டார். இதனால் மேலும் ஆத்திரமடைந்த ராஜேஷ், வீட்டில் இருந்த அரிவாளை எடுத்து சுபிதாவைச் சரமாரியாக வெட்டியுள்ளார்.

ரத்த வெள்ளத்தில் சரிந்த சுபிதா சம்பவ இடத்திலேயே உயிரிழந்தார். மறுநாள் காலை சுபிதாவின் தாயார் வீட்டிற்கு வந்தபோதுதான் இந்த விபரீதம் தெரியவந்தது. இதற்கிடையில், கொலைக்குப் பயன்படுத்திய ஆயுதங்களுடன் ராஜேஷ் இரணியல் காவல் நிலையத்தில் சரணடைந்தார். போலீசார் வழக்குப் பதிவு செய்து ராஜேஷைக் கைது செய்தனர். திருமணத்திற்கு மீறிய உறவு மற்றும் சமூக வலைதளப் பயன்பாடு ஒரு இளம்பெண்ணின் உயிரைப் பறித்ததோடு, ஒரு குடும்பத்தையே சீரழித்துள்ள இச்சம்பவம் அப்பகுதியில் சோகத்தை ஏற்படுத்தியுள்ளது.