“யாரையும் தற்குறி எனச் சொல்ல உங்களுக்கு உரிமையில்லை”.. வம்பிழுத்த நெட்டிசன்களுக்கு ‘வெண்பா’ ஸ்டைலில் ஃபரீனா கொடுத்த தரமான பதிலடி…!!!

தமிழக சட்டமன்றத் தேர்தலில் இந்த முறை முன்னெப்போதும் இல்லாத வகையில் 85 சதவீத வாக்குப்பதிவு பதிவாகி ஆச்சரியத்தை ஏற்படுத்தியுள்ளது. குறிப்பாக, இளைஞர்களின் எழுச்சிமிக்க வருகையே இந்த மாற்றத்திற்கு முக்கிய காரணமாகப் பார்க்கப்படுகிறது. இந்தச் சூழலில், அரசியல் களத்தில் புதிய வரவாக நுழைந்துள்ள நடிகர் விஜய்யின் ‘வெள்ளை சட்டை மற்றும் சந்தன நிற பேண்ட்’ உடை அலங்காரம் இளைஞர்கள் மத்தியில் பெரும் தாக்கத்தை ஏற்படுத்தியது. தேர்தல் நாளன்று சிபிராஜ், விக்ரம், சிம்பு, ஜெய் மற்றும் இயக்குனர் பா. ரஞ்சித் எனப் பல பிரபலங்கள் இதே பாணியிலான உடையில் வந்து வாக்களித்தது சமூக வலைதளங்களில் விவாதத்தைக் கிளப்பியது.

இதே பாணியிலான உடையில் புகைப்படம் பகிர்ந்த நடிகை ஃபரீனா ஆசாத் மீது இணையத்தில் கடுமையான விமர்சனங்கள் முன்வைக்கப்பட்டன. இதற்குத் துணிச்சலாகப் பதிலடி கொடுத்த அவர், “நான் விரும்பும் ஒருவருக்கு வாக்களிப்பதால் நான் தற்குறி ஆகிவிட மாட்டேன்; மற்றவர்களின் தேர்வை விமர்சிப்பதால் நீங்கள் அறிவாளி ஆகிவிட முடியாது” என்று பதிவிட்டுள்ளார். மேலும், இது இளைஞர்களுக்கான புதிய அரசியல் என்றும், ஒருவருக்கு வாய்ப்பளிப்பதில் தவறில்லை என்றும் அவர் குறிப்பிட்டது தற்போது இணையத்தில் பேசுபொருளாகி அவருக்கு ஆதரவைப் பெற்றுத் தந்து வருகிறது.

தொகுப்பாளினியாகத் தனது பயணத்தைத் தொடங்கி ‘பாரதி கண்ணம்மா’ சீரியலில் ‘வெண்பா’ என்ற வில்லி கதாபாத்திரத்தின் மூலம் பட்டிதொட்டியெங்கும் பிரபலமானவர் ஃபரீனா ஆசாத். சீரியலில் தனது மிரட்டலான நடிப்பால் ரசிகர்களைக் கவர்ந்த அவர், தற்போது நிஜ வாழ்க்கையிலும் தனது அரசியல் நிலைப்பாட்டைத் தைரியமாக வெளிப்படுத்தியுள்ளார். சமூக வலைதளங்களில் அவர் பதிவிட்ட இந்த “தரமான பதிலடி” தற்போது வைரலாகி வருவதுடன், அரசியல் மற்றும் திரைத்துறை வட்டாரங்களில் பெரும் கவனத்தை ஈர்த்துள்ளது.