மதுரை செல்லூரைச் சேர்ந்த கல்லூரி மாணவி கலையரசி, உடல் எடையைக் குறைக்க யூடியூப் வீடியோக்களைப் பார்த்து ‘வெங்காரக் கல்’ என்ற பொருளை வாங்கிச் சாப்பிட்டதால் உயிரிழந்த சம்பவம் பெரும் சோகத்தை ஏற்படுத்தியுள்ளது. சிறுவயது முதலே உடல் பருமனாக இருந்த அவர், இணையதளத்தில் வந்த தவறான ஆலோசனையைப் பின்பற்றி நாட்டு மருந்துக் கடையில் வாங்கி உட்கொண்ட சில மணி நேரத்திலேயே வாந்தி, மயக்கம் ஏற்பட்டு சிகிச்சை பலனின்றி மரணமடைந்தார். இந்தச் சம்பவம் தொடர்பாகச் சம்பந்தப்பட்ட யூடியூப் சேனல் மற்றும் விற்பனை செய்த கடை மீது கடும் நடவடிக்கை எடுக்க வேண்டும் எனப் பொதுமக்கள் கோரிக்கை விடுத்துள்ளனர்.
இதைத் தொடர்ந்து, முகவரி இல்லாத விளம்பரங்களையும் சமூக வலைதளங்களில் பகிரப்படும் மருத்துவக் குறிப்புகளையும் பொதுமக்கள் கண்மூடித்தனமாக நம்ப வேண்டாம் என ஆயுஷ் மருந்து கட்டுப்பாட்டு வாரியம் எச்சரிக்கை விடுத்துள்ளது. போலி எண்கள் மூலம் பரப்பப்படும் இதுபோன்ற விளம்பரங்களைக் கட்டுப்படுத்துவது சவாலாக இருப்பதாகவும், உடல்நலம் சார்ந்த பிரச்சனைகளுக்கு அரசு ஆரம்ப சுகாதார நிலையங்களில் உள்ள சித்த மருத்துவர்களை நேரில் அணுகி ஆலோசனை பெறுவதே பாதுகாப்பானது என்றும் அறிவுறுத்தப்பட்டுள்ளது. இளைய தலைமுறையினர் ஆபத்தான மருத்துவப் பரிசோதனைகளைச் சொந்தமாக மேற்கொள்வதைத் தவிர்க்க வேண்டும் எனவும் அதிகாரிகள் கேட்டுக் கொண்டுள்ளனர்.