தமிழக அரசியலில் சட்டமன்றத் தேர்தல் களம் சூடுபிடிக்கத் தொடங்கியுள்ள நிலையில், தேசிய ஜனநாயகக் கூட்டணியில் (NDA) முன்னாள் முதலமைச்சர் ஓ. பன்னீர்செல்வத்தை (OPS) இணைக்க பாஜக தலைமை அதிரடியான ‘மெகா ஆஃபர்’களை வழங்கியுள்ளதாகத் தகவல்கள் வெளியாகியுள்ளன. அதிமுகவில் எடப்பாடி பழனிசாமிக்கும் ஓபிஎஸுக்கும் இடையிலான மோதல் நீடித்து வரும் நிலையில், ஓபிஎஸ் தரப்பைத் தன்வசம் ஈர்க்க பாஜக தீவிரம் காட்டி வருகிறது. இதன் ஒரு பகுதியாக, ஓபிஎஸ்க்கு ஆளுநர் பதவியும், அவரது மகன் ரவீந்திரநாத்திற்கு மாநிலங்களவை உறுப்பினர் (Rajya Sabha MP) பதவியும் வழங்க டெல்லி தலைமை முன்வந்துள்ளதாகக் கூறப்படுகிறது.
அதிமுக பொதுச்செயலாளர் எடப்பாடி பழனிசாமிக்கும் சிக்கல் ஏற்படாத வகையில் இந்தத் திட்டம் வகுக்கப்பட்டுள்ளதாகத் தெரிகிறது. ஓபிஎஸ் தேர்தல் அரசியலில் இருந்து விலகி ஆளுநர் போன்ற உயர் பதவிகளை ஏற்றுக்கொண்டால், அதிமுகவின் ஒற்றைத் தலைமைக்கு எந்த இடையூறும் இருக்காது என இபிஎஸ் தரப்பும் இதற்குச் சம்மதிக்க வாய்ப்புள்ளதாக அரசியல் விமர்சகர்கள் கருதுகின்றனர். அதேசமயம், தனது ஆதரவாளர்கள் திமுக பக்கம் சாய்ந்து வரும் நிலையில், தனது மகனின் அரசியல் எதிர்காலத்தையும், சட்ட ரீதியான பாதுகாப்பையும் கருத்தில் கொண்டு ஓபிஎஸ் இந்த ஆஃபரை ஏற்கத் தயாராகிவிட்டதாகத் தெரிகிறது.
பிரதமர் நரேந்திர மோடி வரும் 23-ஆம் தேதி தமிழகத்திற்குப் பிரச்சாரத்திற்காக வரவுள்ள நிலையில், அதற்குள் ஓபிஎஸ் அணியுடனான கூட்டணிப் பேச்சுவார்த்தையை இறுதி செய்ய பாஜக மேலிடப் பொறுப்பாளர் பியூஷ் கோயல் சென்னை வந்துள்ளார். ஏற்கனவே டிடிவி தினகரன் இந்தக் கூட்டணியை உறுதி செய்துள்ள நிலையில், தற்போது ஓபிஎஸ் மகனும் பியூஷ் கோயலைச் சந்தித்துப் பேசியுள்ளார். இதனால், பிரதமர் மோடி பங்கேற்கும் பொதுக்கூட்ட மேடையில் ஓபிஎஸ் உள்ளிட்ட கூட்டணிக் கட்சித் தலைவர்கள் அனைவரும் ஓரணியில் திரண்டு பாஜக-அதிமுக கூட்டணியின் பலத்தைக் காட்டுவார்கள் என எதிர்பார்க்கப்படுகிறது.