தமிழகத்தில் நடைபெறவுள்ள சட்டமன்றத் தேர்தலில் தேசிய ஜனநாயகக் கூட்டணி மாபெரும் வெற்றி பெற்று, ஒரு “கூட்டணி ஆட்சி” அமையும் என மத்திய அமைச்சர் பியூஷ் கோயல் உறுதிபடத் தெரிவித்துள்ளார். சென்னையில் உள்ள அதிமுக பொதுச்செயலாளர் எடப்பாடி பழனிசாமியின் இல்லத்திற்குச் சென்ற அவர், அங்கு காலை உணவு அருந்தியவாறு தேர்தல் வியூகங்கள் குறித்து விரிவாக ஆலோசனை நடத்தினார். பின்னர் செய்தியாளர்களைச் சந்தித்த கோயல், தேசிய அளவில் பிரதமர் மோடியும், தமிழகத்தில் எடப்பாடி பழனிசாமியும் இக்கூட்டணியை வழிநடத்துவார்கள் என்றும், ஊழல் நிறைந்த திமுக ஆட்சியை மக்கள் வேரறுப்பார்கள் என்றும் விமர்சித்தார்.
அமமுக உள்ளிட்ட கட்சிகள் ஏற்கனவே கூட்டணியில் இணைந்துவிட்ட நிலையில், எடப்பாடி – பியூஷ் கோயல் இடையிலான இந்தச் சந்திப்பு தொகுதிப் பங்கீட்டு நடைமுறைகள் நிறைவடைந்ததைச் சுட்டிக்காட்டுகிறது. திமுக அரசால் இளைஞர்களும் பெண்களும் பாதிக்கப்பட்டுள்ளதாகக் குறிப்பிட்ட அமைச்சர், நீதிமன்றக் கண்டனத்திற்கு உள்ளான உதயநிதி ஸ்டாலின் பதவி விலக வேண்டும் என்றும் வலியுறுத்தினார். நாளை நடைபெற உள்ள பிரம்மாண்ட பொதுக்கூட்டத்தில் பிரதமர் மோடி பங்கேற்று உரையாற்ற உள்ள நிலையில், இந்தச் சந்திப்பு தமிழக அரசியலில் ஒரு முக்கியத் திருப்பமாகக் கருதப்படுகிறது.