தமிழ் சினிமாவின் முன்னணி நடிகராக திகழ்ந்து கொண்டிருக்கும் விஜய் தமிழக வெற்றிக்கழகம் என்ற கட்சியை தொடங்கி 2026 சட்டமன்றத் தேர்தலை எதிர்கொள்ள உள்ளார். தனது கட்சியை வலுப்படுத்தும் முயற்சியில் தொடர்ந்து ஈடுபட்டு வரும் விஜய், திமுக ஆட்சியை எப்படியாவது ஒழித்து விட வேண்டும் என்ற நிலைப்பாட்டில் செயல்பட்டு வருகிறார். சமீபத்தில் நடந்த கட்சியின் பொதுக்கூட்டத்தில் விஜய் தான் முதல்வர் வேட்பாளர் என அறிவிக்கப்பட்டது. அதேசமயம் அதிமுக மற்றும் பாஜக உள்ளிட்ட கட்சிகள் தொடர்ந்து விஜய்க்கு அழைப்பு விடுத்து வருகின்றன.
இதனால் விஜய் யாருடன் கூட்டணி அமைக்க போகிறார் என்பது மிகப் பெரிய எதிர்பார்ப்பாக உள்ளது. இந்நிலையில் தமிழக வெற்றிக்கலகம் கட்சியின் ராணிப்பேட்டை மாவட்ட வழக்கறிஞர் அணியின் இணை ஒருங்கிணைப்பாளர் அஜய், சீமான் முன்னிலையில் நாம் தமிழர் கட்சியில் இணைந்தார். மேலும் அவரது ஆதரவாளர்கள் 100க்கும் மேற்பட்டோர் நாம் தமிழர் கட்சியில் இணைந்துள்ளனர். மேலும் தமிழக வெற்றிக்கழகம் கட்சியில் உழைக்கும் நிர்வாகிகளுக்கு மதிப்பில்லை, ஒருங்கிணைப்பு இல்லை எனவும் அஜய் குற்றம் சாட்டியுள்ளார். பல மாவட்டங்களில் பொறுப்புக்கு பணம் வாங்கப்படுவதாக தமிழக வெற்றிக்கழகம் மீது ஏற்கனவே குற்றச்சாட்டு உள்ளது குறிப்பிடத்தக்கது.