டெல்லியில் மத்திய உள்துறை அமைச்சர் அமித்ஷாவை அதிமுக பொதுச்செயலாளர் எடப்பாடி பழனிசாமியும் அம்மா மக்கள் முன்னேற்றக் கழகப் பொதுச்செயலாளர் டிடிவி தினகரனும் விரைவில் சந்திக்கவிருப்பதாக வெளியாகி இருக்கும் தகவல், தமிழக அரசியலில் பெரும் பரபரப்பை ஏற்படுத்தியுள்ளது.
இந்தச் சந்திப்பின் மூலம் அதிமுகவின் எதிர்காலத்தில் மிகப்பெரிய அரசியல் மாற்றங்கள் நிகழலாம் என எதிர்பார்க்கப்படும் வேளையில், டிடிவி தினகரன் மற்றும் சசிகலாவை மீண்டும் கட்சியில் இணைக்க வேண்டும் என்ற சில அதிமுக நிர்வாகிகளின் விருப்பத்திற்குப் பின்னால் டெல்லியின் அழுத்தம் இருப்பதாகக் கூறப்படுகிறது. குறிப்பாக, தென் மாவட்ட வாக்கு வங்கியை வலுப்படுத்தவும், ஓபிஎஸ், சசிகலா, தினகரன் ஆகியோரை உள்ளடக்கிய ஒரு ஒருங்கிணைந்த அதிமுகவை உருவாக்கவும் பாஜக தலைமை விரும்புவதாகவும், இதற்காகவே எடப்பாடி பழனிசாமிக்குத் தொடர்ந்து நெருக்கடிகள் கொடுக்கப்பட்டு வருவதாகவும் அரசியல் வட்டாரங்கள் தெரிவிக்கின்றன.