‘நான் சாகப் போறேன்.. என் சாவுக்கு காரணம் இதுதான்’… அரசு ஊழியரின் கண்ணீர் வரவழைக்கும் கடைசி கடிதம்…..!

டெல்லி சாகேத் நீதிமன்ற வளாகத்தில் நிலவும் கடும் பணிச்சுமை காரணமாக, ஹரிஷ் சிங் மஹர் என்ற 43 வயது மாற்றுத்திறனாளி நீதிமன்ற ஊழியர், கட்டிடத்தின் மேலிருந்து குதித்து தற்கொலை செய்து கொண்ட சம்பவம் பெரும் சோகத்தை ஏற்படுத்தியுள்ளது. கடந்த மூன்று மாதங்களாக நிர்வாக எழுத்தராக  பணியாற்றி வந்த அவர், 60 சதவீத உடல் ஊனம் கொண்டவர் என்பது குறிப்பிடத்தக்கது.

தற்கொலைக்கு முன்னதாக அவர் எழுதிய கடிதத்தில், தனக்கு வழங்கப்பட்ட பணி மிகவும் கடினமாக இருந்ததாகவும், கடுமையான வேலை அழுத்தம் காரணமாக தூக்கமின்றி தவித்ததாகவும் உருக்கமாகக் குறிப்பிட்டுள்ளார். மேலும், வருங்காலத்தில் மாற்றுத்திறனாளி ஊழியர்களுக்கு அவர்களின் உடல்நிலைக்கு ஏற்றவாறு ‘இலகுவான பணிகள்’  வழங்கப்பட வேண்டும் என்று உயர்நீதிமன்றத்திற்கு அவர் கோரிக்கை விடுத்துள்ளார்.

இந்தச் சம்பவத்தைத் தொடர்ந்து, சாகேத் நீதிமன்ற ஊழியர்கள் முறையான விசாரணை கோரி பணிகளைப் புறக்கணித்து போராட்டத்தில் ஈடுபட்டனர். நீதிமன்றங்களில் நிலவும் கடுமையான பணியாளர் பற்றாக்குறை காரணமாக, மூன்று பேருக்குரிய வேலையை ஒருவரே செய்ய வேண்டிய கட்டாயம் இருப்பதாகவும், இது ஊழியர்களின் மனநலனைப் பாதிப்பதாகவும் சாகேத் நீதிமன்ற சங்கத்தினர் குற்றம் சாட்டியுள்ளனர். இறந்த ஊழியருக்கு நீதி கிடைக்க வேண்டும் என்றும், பணிச்சுமையைக் குறைக்க உரிய நடவடிக்கை எடுக்க வேண்டும் என்றும் வலியுறுத்தி அவர்கள் கோஷமிட்டனர். இந்தத் துயரச் சம்பவம் அரசு அலுவலகங்களில் மாற்றுத்திறனாளிகளுக்கான பணிச்சூழல் மற்றும் மன அழுத்தம் குறித்த கவலையை எழுப்பியுள்ளது.