“2026 தேர்தலில் மாம்பழம் யாருக்கு?”… தேர்தல் ஆணையத்தின் அதிரடி முடிவு…. ராமதாஸிற்கு விழுந்த பலத்த அடி… குஷியில் அன்புமணி….!

பாமக உட்கட்சி விவகாரத்தில் டெல்லி உயர் நீதிமன்றம் வழங்கிய தீர்ப்பை எதிர்த்து இந்திய தேர்தல் ஆணையம் மேல்முறையீடு செய்துள்ள சம்பவம், தமிழக அரசியலில் பெரும் பரபரப்பை ஏற்படுத்தியுள்ளது. பாட்டாளி மக்கள் கட்சியில் டாக்டர் ராமதாஸ் மற்றும் அன்புமணி ராமதாஸ் இடையே தலைமைப் பொறுப்பு குறித்து மோதல் நிலவி வரும் நிலையில், இந்த புதிய சட்டப் போராட்டம் ராமதாஸ் தரப்பிற்கு ஒரு பின்னடைவாகக் கருதப்படுகிறது.

முன்னதாக, அன்புமணி ராமதாஸை கட்சியின் தலைவராக தேர்தல் ஆணையம் அங்கீகரித்ததை எதிர்த்து ராமதாஸ் தரப்பு டெல்லி உயர் நீதிமன்றத்தில் வழக்கு தொடர்ந்திருந்தது. இந்த வழக்கை விசாரித்த நீதிமன்றம், பாமக ஒரு அங்கீகரிக்கப்பட்ட கட்சி இல்லை என்பதால், அதன் உட்கட்சி விவகாரங்களில் தலையிட தேர்தல் ஆணையத்திற்கு சட்டப்பூர்வ அதிகாரம் இல்லை என்று தீர்ப்பளித்தது. இந்த தீர்ப்பு அன்புமணி தரப்பிற்கு ஒரு சிக்கலாகவும், ராமதாஸ் தரப்பிற்கு ஒரு தார்மீக வெற்றியாகவும் பார்க்கப்பட்டது.

இந்தத் தீர்ப்பைத் தொடர்ந்து, கட்சியின் அதிகாரப்பூர்வச் சின்னமான ‘மாம்பழம்’ தங்களுக்குத் தான் ஒதுக்கப்பட வேண்டும் என்று ராமதாஸ் தரப்பு சென்னை உயர் நீதிமன்றத்தில் மனுத் தாக்கல் செய்தது. வரும் தேர்தலில் இந்தச் சின்னம் தங்களுக்குக் கிடைக்கும் என்றும், அதன் மூலம் கூட்டணிப் பேச்சுவார்த்தைகளில் கூடுதல் பலம் பெறலாம் என்றும் ராமதாஸ் நம்பிக்கை தெரிவித்திருந்தார். ஆனால், தற்போது டெல்லி நீதிமன்றத் தீர்ப்பை மறுஆய்வு செய்யக் கோரி தேர்தல் ஆணையம் மனு அளித்துள்ளதால், இந்த விவகாரத்தில் இழுபறி நீடிக்கிறது.

தேர்தல் ஆணையத்தின் இந்த அதிரடி நடவடிக்கையால், சின்னம் தொடர்பான வழக்கு விசாரணை தள்ளிப்போக வாய்ப்புள்ளதாகக் கூறப்படுகிறது. தேர்தல் நெருங்கும் வேளையில் மாம்பழச் சின்னம் யாரிடம் இருக்கும் என்ற குழப்பம் நீடிப்பது ராமதாஸ் தரப்புக்கு ஒரு பெரும் சவாலாக மாறியுள்ளது. ஒருவேளை தேர்தல் ஆணையத்தின் கோரிக்கை ஏற்கப்பட்டால், பாமகவின் அதிகாரப்பூர்வத் தலைமை யார் என்பதில் மீண்டும் ஒரு சட்டப் போராட்டமே அரங்கேறும் என்று எதிர்பார்க்கப்படுகிறது.