” கிளிக்கு வந்த விசித்திர ஆபத்து…! வயிற்றில் சிக்கிய முட்டை… ரூ. 1.5 லட்சம் ஆபரேஷன்…! நெஞ்சை பதறவைக்கும் சிறுமியின் பாசப் போராட்டம்…!!”

மேற்கு வங்கத்தின் கொன்னகர் பகுதியைச் சேர்ந்த ஷ்யாம் லால் என்பவர், கடந்த இரண்டு ஆண்டுகளாக ‘மிது’ என்ற செல்லக் கிளியை வளர்த்து வருகிறார். அவரது பேத்தி தியா, அந்த கிளியுடன் மிகுந்த பாசத்தோடு பழகி வந்துள்ளார். சில நாட்களுக்கு முன்பு மிது சாப்பிடாமலும், பேசாமலும் அமைதியாக இருந்ததை கவனித்த தியா, தனது தாத்தாவை வற்புறுத்தி அதை மருத்துவரிடம் அழைத்துச் சென்றார். அங்கு மருத்துவப் பரிசோதனையில், மிதுவின் உடலில் முட்டை சிக்கியிருப்பது கண்டறியப்பட்டது. இந்த நிலை ‘எக் பைண்டிங்’ என்று அழைக்கப்படுகிறது.

பறவைகளின் உடலில் கால்சியம் படிவதால் ஏற்படும் இந்த பிரச்சனை, அவற்றின் உயிருக்கே ஆபத்தானது என்று மருத்துவர்கள் எச்சரித்தனர். மிதுவின் உடலில் இருந்த முட்டையின் அளவு பெரியதாக இருந்ததால், அது இயற்கையாக வெளியே வர வாய்ப்பில்லை எனத் தெரிந்தது. கொல்கத்தாவில் மருந்து மூலம் முட்டையை அகற்ற முயன்றும் அது தோல்வியில் முடிந்தது. இதனால் அறுவை சிகிச்சை மட்டுமே ஒரே வழி என்று மருத்துவர்கள் கூறினர். ஆனால், இடுப்புப் பகுதியில் செய்யப்படும் இந்த மிகவும் சிக்கலான அறுவை சிகிச்சையை மேற்கொள்ளக்கூடிய நிபுணர்கள் அங்கு இல்லை.

இந்த சிகிச்சைக்கு சுமார் ரூ. 1.5 லட்சம் வரை செலவாகும் என்று மதிப்பிடப்பட்ட நிலையில், மிதுவைக் காப்பாற்ற டெல்லிக்கு அழைத்துச் செல்லுமாறு அறிவுறுத்தப்பட்டது. இந்தியாவில் இதுபோன்ற ஆபத்தான மற்றும் நுட்பமான சிகிச்சைகளை அளிக்கக்கூடிய பறவை மருத்துவ நிபுணர்கள் மிகக் குறைவாகவே உள்ளனர். தற்போது, டெல்லியில் உள்ள மருத்துவர்கள் கிளிக்கு அறுவை சிகிச்சை செய்யாமல், மாற்று வழிகள் மூலம் அந்த முட்டையை பாதுகாப்பாக வெளியே கொண்டு வருவதற்கான முயற்சிகளில் தீவிரமாக ஈடுபட்டு வருகின்றனர்.