கள்ளக்குறிச்சி உளுந்தூர்பேட்டையில் அதிமுக பொதுக்கூட்டம் நடைபெற்றது. இதில் பேசிய அந்த கட்சியின் பொதுச்செயலாளர் எடப்பாடி பழனிச்சாமி, இதோடு அதிமுக முடிந்துவிடும் என்று முதல்வர் ஸ்டாலின் பேசி வருகிறார். ஆனால் அவருடைய பகல் கனவு ஒருபோதும் பலிக்காது . நாட்டை காப்பதற்கு ராணுவம் போல அதிமுகவை வெற்றி பெற செய்ய சிப்பாய்களாக தொண்டர்கள் இருக்கிறார்கள். எடப்பாடி பொறுப்பு ஏற்ற பிறகு 10 தேர்தலில் அதிமுக தோல்வி அடைந்து விட்டது என்று ஸ்டாலின் பேசுகிறார். ஆனால் 2011 முதல் 2021 வரை எத்தனை முறை திமுக தோல்வி அடைந்தது என்பதை அவர் யோசித்துப் பார்க்க வேண்டும்.
2011 ஆம் வருடம் எதிர்க்கட்சி வரிசையில் கூட அமர முடியாமல் போனது திமுக. 2021 இல் மக்களை ஏமாற்றுவதற்காக 500க்கும் மேலான அறிவிப்புகளை வெளியிட்டார்கள். பொய் சொல்லி ஆட்சிக்கு வந்தது திமுக. திமுக அமைச்சர்கள் மீது உள்ள அனைத்து ஊழல் வழக்குகளும் அதிமுக ஆட்சி அமைந்ததும் விரைந்து விசாரிக்கப்படும். ஒருவரையும் விடமாட்டோம். வேண்டுமென்றே பொய் வழக்கு போடுவது, அதிமுகவை அவதூராக பேசுவது எல்லாம் வேடிக்கை பார்க்க வேண்டுமா? வேடிக்கை பார்த்த காலம் மாறிவிட்டது. அன்று இருந்த பழனிச்சாமி வேறு. இனி பார்க்க போகிற பழனிசாமி வேறு” என்று பேசி உள்ளார்.