ரூ.100 கோடி பள்ளி அங்கீகார ஊழல்…. அன்பில் மகேஷை வளைத்த அமலாக்கத்துறை… சிக்கிய ரகசிய சான்றுகள்….!

கடந்த திமுக ஆட்சிக் காலத்தில் தனியார் பள்ளிகளுக்கான அங்கீகாரத்தைப் புதுப்பிக்கவும், தடையில்லாச் சான்றிதழ்களைப் (NOC) பெறவும் 100-க்கும் மேற்பட்ட தனியார் பள்ளிகளிடம் இருந்து சுமார் ரூ.100 கோடி வரை லஞ்சம் பெறப்பட்டதாகத் தமிழ்நாடு தனியார் பள்ளி உரிமையாளர்கள் சங்கம் சார்பில் தீவிரக் குற்றச்சாட்டு முன்வைக்கப்பட்டது. இப்புகாரின் அடிப்படையில் வழக்குப் பதிவு செய்த சென்னை மத்திய குற்றப்பிரிவு காவல்துறையினர், முதற்கட்டமாக பி.டி. அரசகுமார் என்பவரைக் கைது செய்து தீவிர விசாரணை மேற்கொண்டனர்.

கைதான நபரிடம் நடத்தப்பட்ட விசாரணை, கைப்பற்றப்பட்ட ஆவணங்கள் மற்றும் மின்னணுச் சான்றுகளின் அடிப்படையில், அன்றைய பள்ளிக் கல்வித்துறை அமைச்சராக இருந்த அன்பில் மகேஷ் பொய்யாமொழியின் பெயர் இந்த வழக்கில் முதன்மையாகச் சேர்க்கப்பட்டது. இதன் தொடர்ச்சியாக, கடந்த செப்டம்பர் 16-ஆம் தேதி அன்பில் மகேஷ் பொய்யாமொழியின் இல்லம் மற்றும் அவருக்குத் தொடர்புடைய பல்வேறு இடங்களில் மத்திய குற்றப்பிரிவு போலீசார் அதிரடிச் சோதனையில் ஈடுபட்டனர்.

இந்தச் சோதனையின் முடிவில், வழக்கு தொடர்பாக 118 முக்கிய ஆவணங்கள், 18 கைபேசிகள், 3 மடிக்கணினிகள், ஹார்டு டிஸ்க்குகள் பொருந்திய 2 கணினிகள் மற்றும் பல்வேறு வங்கிச் காசோலைகள் பறிமுதல் செய்யப்பட்டதாகக் காவல் துறை தரப்பில் தெரிவிக்கப்பட்டது. இச்சான்றுகளின் அடிப்படையில், விசாரணைக்கு ஆஜராகுமாறு அனுப்பப்பட்ட சம்மனை ஏற்று, கடந்த 18-ஆம் தேதி சென்னை வேப்பேரியில் உள்ள மத்திய குற்றப்பிரிவு அலுவலகத்தில் ஆஜரான அன்பில் மகேஷிடம் அதிகாரிகள் சுமார் 8 மணி நேரத்திற்கும் மேலாகத் தீவிர விசாரணை நடத்தினர்.

இந்நிலையில், மத்திய குற்றப்பிரிவு போலீசார் பதிவு செய்துள்ள எஃப்.ஐ.ஆர் (FIR) மற்றும் திரட்டப்பட்ட ஆதாரங்களின் அடிப்படையில், இந்த வழக்கின் பின்னணியில் உள்ள சட்டவிரோதப் பணப் பரிவர்த்தனை குறித்து அமலாக்கத்துறையும் (ED) தற்போது தனது விசாரணையைத் தொடங்கியுள்ளது. மத்திய குற்றப்பிரிவிடமிருந்து ஆவணங்களைப் பெற்றுள்ள அமலாக்கத்துறை, அடுத்தகட்டமாகச் சம்மன் அனுப்பி அன்பில் மகேஷிடம் விசாரணை நடத்தத் திட்டமிட்டுள்ளதால் இந்த விவகாரம் அரசியல் வட்டாரத்தில் பெரும் பரபரப்பை ஏற்படுத்தியுள்ளது.