திமுகவுடன் கூட்டணி … இரவோடு இரவாக அறிவித்தார்… காலையிலேயே விஜய்க்கு ஷாக்…..!

தமிழகத்தில் வரவிருக்கும் சட்டமன்றத் தேர்தலை முன்னிட்டு அரசியல் களம் சூடுபிடித்துள்ள நிலையில், திமுக மற்றும் காங்கிரஸ் இடையிலான கூட்டணி குறித்து நிலவி வந்த பல்வேறு ஊகங்களுக்கு முற்றுப்புள்ளி வைக்கும் வகையில் காங்கிரஸ் மேலிடப் பொறுப்பாளர் கே.சி. வேணுகோபால் கருத்து தெரிவித்துள்ளார். சென்னையில் நடைபெற்ற காங்கிரஸ் மாவட்டத் தலைவர்கள் கூட்டத்தில் பங்கேற்ற அவர், திமுக மற்றும் காங்கிரஸ் இடையிலான கூட்டணி தற்போதும் வலுவாகத் தொடர்வதாகவும், வகுப்புவாத சக்திகளைத் தோற்கடிக்க இரு கட்சிகளும் இணைந்து செயல்படும் என்றும் திட்டவட்டமாகத் தெரிவித்தார்.

கூட்டணி குறித்து கட்சியின் இரண்டாம் கட்டத் தலைவர்கள் தெரிவிக்கும் கருத்துகள் அனைத்தும் அவர்களின் தனிப்பட்ட கருத்துகளே தவிர, அவை கட்சியின் அதிகாரப்பூர்வ முடிவுகள் அல்ல என்று அவர் தெளிவுபடுத்தினார். காங்கிரஸ் நிர்வாகிகள் பொதுவெளியில் கூட்டணிக்கு ஆதரவாகவோ அல்லது எதிராகவோ பேசுவதைத் தவிர்க்க வேண்டும் என்று அறிவுறுத்தியுள்ள அவர், கூட்டணி தொடர்பான இறுதி முடிவுகளை அகில இந்திய காங்கிரஸ் தலைமை மற்றும் ராகுல் காந்தி மட்டுமே எடுப்பார்கள் என்று குறிப்பிட்டார்.

திமுக காங்கிரஸின் நீண்டகால மற்றும் நம்பிக்கைக்குரிய கூட்டாளி என்று வர்ணித்த வேணுகோபால், தேர்தல் தொகுதிப் பங்கீடு மற்றும் கூட்டணி ஆட்சி குறித்த பேச்சுவார்த்தைக்கு திமுக அழைப்பு விடுக்கக் காத்திருப்பதாகக் கூறினார். ஒரு தேசியக் கட்சி என்ற முறையில் காங்கிரஸிற்கு எனத் தனிப்பட்ட அரசியல் லட்சியங்கள் இருப்பதாகவும், தங்களின் நிலைப்பாட்டை திமுகவிடம் முறையாக எடுத்துரைப்போம் என்றும் அவர் செய்தியாளர்களிடம் தெரிவித்தார்.

அதேவேளையில், நடிகர் விஜய்யின் தமிழக வெற்றிக் கழகத்துடன் கூட்டணி அமையுமா என்ற கேள்விக்கு நேரடியான பதிலை அவர் தவிர்க்க முற்பட்டார். தற்போதுள்ள அரசியல் சூழலில் திமுக – காங்கிரஸ் கூட்டணி நீடிப்பது உறுதி செய்யப்பட்டுள்ள நிலையில், தேர்தல் நெருங்கும் வேளையில் அதிகாரப்பூர்வ தொகுதிப் பங்கீடு மற்றும் ஆட்சியில் பங்கு குறித்த பேச்சுவார்த்தைகள் கூடுதல் முக்கியத்துவம் பெறும் என்று எதிர்பார்க்கப்படுகிறது.