மேற்கு ஆசிய பிராந்தியத்தில் அமெரிக்காவிற்கும் ஈரானுக்கும் இடையே கடந்த சில மாதங்களாகத் தொடர்ந்து பதற்றமான சூழல் நிலவி வருகிறது. இத்தகைய சூழலில், அமெரிக்கப் படைகளிடம் வெடிமருந்துகளுக்கும் அதிநவீன ஆயுதங்களுக்கும் பெரும் தட்டுப்பாடு ஏற்பட்டுள்ளதாகச் சமூக வலைதளங்களிலும் ஊடகங்களிலும் பல்வேறு யூகங்கள் பரவின. இந்நிலையில், இத்தகைய செய்திகளை அமெரிக்க அதிபர் டொனால்ட் ட்ரம்ப் முற்றிலுமாக மறுத்து அறிக்கை வெளியிட்டுள்ளார்.
தனது ‘ட்ரூத் சோசியல்’ (Truth Social) தளத்தில் பதிவிட்டுள்ள அதிபர் ட்ரம்ப், அமெரிக்காவிடம் போதிய ஆயுதங்கள் இல்லை என்று கூறுபவர்கள் கோழைகளும் துரோகிகளுமே ஆவர் எனச் சாடியுள்ளார். மேலும், “நம்மிடம் உள்ள அனைத்து வகையான ஆயுதங்களையும் முழுமையாகப் பயன்படுத்துவதை நம்மால் கற்பனை செய்துகூட பார்க்க முடியாது; முன்னெப்போதும் இல்லாத அளவிற்கு நமது ஆயுதக் கையிருப்பைத் தொடர்ந்து அதிகரித்து வருகிறோம்” என்று அவர் உறுதியளித்துள்ளார்.
ஈரான் அதிபர் மசூத் பெஷெஷ்கியன் தலைமையிலான தூதுக்குழு, நியூயார்க்கில் நடைபெறவுள்ள ஐக்கிய நாடுகள் பொதுச் சபைக் கூட்டத்தில் (UNGA) பங்கேற்கவுள்ள சூழலில் ட்ரம்ப்பின் இந்த அறிக்கை வெளியாகியுள்ளது குறிப்பிடத்தக்கது. ஈரானிய தூதுக்குழுவின் இந்த அமெரிக்கப் பயணத்திற்காக அதிபர் ட்ரம்பின் நிர்வாகம் ஏற்கனவே விசாக்களை வழங்கி ஒப்புதல் அளித்துள்ளது.
ஐ.நா. பொதுச் சபைக் கூட்டத்தின் இடைவெளியில் ஈரான் அதிபர் மசூத் பெஷெஷ்கியனை நேரில் சந்திப்பது குறித்து அதிபர் ட்ரம்ப் சூசகமாகத் தெரிவித்துள்ளார். இதனால், உலகளவில் பெரும் எதிர்பார்ப்பை ஏற்படுத்தியுள்ள இந்த அமெரிக்க-ஈரான் அதிபர்களின் தனிப்பட்ட சந்திப்பு நடைபெறுமா என்பதைப் பொறுத்திருந்துதான் பார்க்க வேண்டும்.