“அவங்ககிட்ட அணு ஆயுதம் இருந்தா”…. அமைதி ஒப்பந்தம் க்ளோஸ்! மீண்டும் வெடிக்கும் போர்?…. மேடையிலேயே ஈரானை கதறவிட்ட டிரம்ப்…. நடுங்கும் மத்திய கிழக்கு நாடுகள்…!

மத்திய கிழக்கில் மீண்டும் போர் மேகங்கள் சூழத் தொடங்கியுள்ளன. அமெரிக்காவுக்கும் ஈரானுக்கும் இடையே கடந்த பிப்ரவரி மாதம் முதல் தீவிரமாக நடைபெற்று வந்த போரை முடிவுக்குக் கொண்டு வர, கடந்த மாதம் தான் இரு நாடுகளும் ஒரு தற்காலிக இடைக்கால ஒப்பந்தத்தில் கையெழுத்திட்டன. ஆனால், உலகளாவிய எரிசக்தி போக்குவரத்தில் சுமார் 20 சதவீதத்தைக் கொண்டுள்ள முக்கிய வழித்தடமான ஹார்முஸ் ஜலசந்தியைத் தன் கட்டுப்பாட்டில் வைக்க ஈரான் முயன்றதே தற்போதைய பதற்றத்திற்குப் பிள்ளையார் சுழி போட்டுள்ளது. அங்கு அமெரிக்கக் கப்பல்கள் மீது ஈரான் தாக்குதல் நடத்தியதாகக் கூறி, அதற்குப் பதிலடியாக ஈரானின் பந்தர் அப்பாஸ், சிரிக் துறைமுக நகரங்கள் மற்றும் கெஷ்ம் தீவில் உள்ள சொத்துக்கள் மீது அமெரிக்கா அண்மையில் வான்வழித் தாக்குதல்களை நடத்தி அதிரவைத்துள்ளது.

இந்த அதிரடித் தாக்குதல்கள் நடந்து முடிந்த சில மணிநேரங்களிலேயே, துருக்கியில் நடைபெற்ற நேட்டோ (NATO) உச்சி மாநாட்டில் அமெரிக்க அதிபர் டொனால்ட் டிரம்ப் இதுகுறித்து அதிரடியான கருத்துக்களைப் பகிர்ந்துள்ளார். கடந்த மாதம் ஈரானுடன் போடப்பட்ட போர்நிறுத்தப் புரிந்துணர்வு ஒப்பந்தம் அதிகாரப்பூர்வமாக முடிவுக்கு வந்துவிட்டதாக அறிவித்த அவர், ஈரானியத் தலைமையைக் கடுமையாக விமர்சித்தார். “அவர்கள் கொடூரமான, வன்முறை குணம் கொண்ட நோயாளிகள்; அவர்களிடம் அணு ஆயுதம் இருந்தால் நிச்சயம் பயன்படுத்துவார்கள்” என்று சாடிய டிரம்ப், இனி அவர்களுடன் பேசுவது நேரத்தை வீணடிப்பதற்குச் சமம் என்றும், தனிப்பட்ட முறையில் தான் இனி அவர்களுடன் எந்தத் தொடர்பும் வைத்துக்கொள்ளப் போவதில்லை என்றும் திட்டவட்டமாகக் கூறியுள்ளார். எனினும், அமெரிக்கப் பிரதிநிதிகள் பேச்சுவார்த்தைகளைத் தொடரலாம் என்ற ஒரு சிறிய வாசலையும் திறந்து வைத்துள்ளார்.

மறுபுறம், ஈரானின் முன்னாள் உச்ச தலைவர் அயதுல்லா அலி கமேனியின் மறைவிற்காக அந்நாடு ஒரு வார கால துக்கத்தை அனுசரித்து வருகிறது. ஜூலை 9-ஆம் தேதியுடன் இந்த இறுதிச்சடங்குகள் முடிவடைய உள்ள நிலையில், அதன் பிறகு இரு நாடுகளுக்கும் இடையே நிரந்தரப் போர் நிறுத்தத்திற்கான இறுதி ஒப்பந்தப் பேச்சுவார்த்தைகள் தொடங்கும் என்று எதிர்பார்க்கப்பட்டது. ஆனால், அதற்குள்ளாகவே அமெரிக்கா நடத்தியுள்ள இந்த பெரும் தாக்குதல்களும், அதிபர் டிரம்பின் ஆவேசமான பேச்சுக்களும் ஒட்டுமொத்த அமைதி முயற்சிகளையும் குலைத்துள்ளன. “இதற்கு அமெரிக்காவிற்கு நசுக்கும் பதிலடி கொடுப்போம்” என ஈரானும் எச்சரித்துள்ளதால், மத்திய கிழக்கு பிராந்தியம் மீண்டும் ஒரு கோரமான போரின் விளிம்பிற்குத் தள்ளப்பட்டு, உலகளாவிய அளவில் பெரும் பதற்றத்தை ஏற்படுத்தியுள்ளது.