விஜய்க்கு ஷாக் கொடுத்த திருமாவளவன்… பாமக-வுடன் ரகசிய டீல்?…. பனையூர் தோட்டத்தில் வெடித்த ரகசியம்…. கொதிக்கும் தமிழக அரசியல்….!

தமிழக அரசியல் களம் 2026 சட்டசபை தேர்தலுக்குப் பிறகும், முன்னெப்போதும் இல்லாத வகையில் உச்சகட்ட கொதிநிலையை எட்டியுள்ளது. தேர்தலில் தனித்து களம் கண்டு 108 தொகுதிகளில் வென்று தனிப்பெரும் கட்சியான தமிழக வெற்றிக்கழகம், ஆட்சி அமைக்கத் தேவையான பெரும்பான்மை இல்லாததால் கூட்டணி கட்சிகளின் ஆதரவோடு தற்போது ஆட்சியில் உள்ளது. விஜய்யின் “ஆட்சியிலும் பங்கு, அதிகாரத்திலும் பங்கு” என்ற அறிவிப்பின்படி காங்கிரஸ், விடுதலை சிறுத்தைகள் (விசிக), ஐயூஎம்எல் ஆகிய கட்சிகள் அமைச்சரவையில் இடம்பிடித்துள்ளன. ஆனால், சமீபகாலமாக விசிக தலைவர் திருமாவளவன் “தவெக அரசில் அங்கம் வகிக்கிறோம், அதேநேரம் திமுக கூட்டணியிலும் தொடர்கிறோம்” என மாறி மாறிப் பேசி வருவது அரசியல் வட்டாரத்தில் பெரும் குழப்பத்தையும் பரபரப்பையும் ஏற்படுத்தியுள்ளது.

இந்த திடீர் திருப்பங்களுக்குப் பின்னணியில் விசிக தவெகவிற்கு கொடுத்து வரும் அடுக்கடுக்கான நெருக்கடிகளே காரணம் என்று சொல்லப்படுகிறது. திருமாவளவனை துணை முதலமைச்சராக்க வேண்டும் என விசிக மாவட்ட நிர்வாகிகள் தீர்மானம் நிறைவேற்றியதோடு, முக்கியத்துவமான துறைகள், வாரியத் தலைவர் பதவிகள் மற்றும் வரவிருக்கும் உள்ளாட்சித் தேர்தலில் மூன்று மேயர் பதவிகள் எனப் பெரிய பட்டியலையே விஜய் தரப்பிடம் விசிக நீட்டியுள்ளதாகத் தெரிகிறது. வெறும் 4 எம்.எல்.ஏ-க்களை வைத்துக் கொண்டு இவ்வளவு பெரிய கோரிக்கைகளை வைப்பதா என்று தவெகவின் பனையூர் வட்டாரம் கடும் அதிருப்தியிலும் கோபத்திலும் இருப்பதாகக் கூறப்படுகிறது. விசிகவின் இந்த தொடர் அழுத்தங்கள் முதல்வர் விஜய்க்கு பெரும் சங்கடத்தை ஏற்படுத்தியுள்ளது.

விசிகவின் இந்த முரண்பட்ட போக்கை உற்று நோக்கி வரும் பாமக தற்போது தவெக அரசை நோக்கி நெருங்கி வருவதாக அரசியல் நோக்கர்கள் கருதுகின்றனர். தேர்தலுக்கு முன்பும் சரி, பின்பும் சரி விஜய்யும் பாமகவுடன் எவ்வித நேரடி மோதல் போக்கையும் கையாளவில்லை. மேலும், தவெக அரசு அமைந்த பிறகு சட்டமன்றத்தில் நடந்த நம்பிக்கை வாக்கெடுப்பில் பாமக நடுநிலை வகித்தது, சாதிவாரி கணக்கெடுப்பு நடத்த விஜய் உத்தரவிட்டது மற்றும் காவிரி விவகாரத்தில் அனைத்துக் கட்சிக் கூட்டத்தைக் கூட்டியது போன்ற தவெகவின் நடவடிக்கைகள் பாமகவிற்கு மிகவும் சாதகமாக அமைந்துள்ளன. இதனால் இரு கட்சிகளுக்கும் இடையேயான இணக்கமான சூழல் நாளுக்கு நாள் அதிகரித்து வருகிறது.

சமீபத்தில் பாமக தலைவர் அன்புமணி ராமதாஸ் தனது கட்சி எம்.எல்.ஏ-க்களுடன் முதல்வர் விஜய்யை நேரில் சந்தித்து வெகுவாகப் பாராட்டியது இந்த கூட்டணி சாத்தியக்கூறுகளை மேலும் உறுதிப்படுத்துவதாக அமைந்துள்ளது. ஒருவேளை பதவிகளைப் பேரம் பேசி விசிக தொடர்ந்து தவெக அரசுக்கு முட்டுக்கட்டை போட்டாலோ அல்லது கூட்டணியில் இருந்து வெளியேறினாலோ, அதற்கு மாற்றாக பாமகவின் ஆதரவைப் பெற்று ஆட்சியைத் தக்கவைக்க விஜய் தரப்பு தயாராகி வருவதாகப் பனையூர் வட்டாரத் தகவல்கள் தெரிவிக்கின்றன. இதனால், 2026 தேர்தல் முடிவுகளுக்குப் பிந்தைய தமிழக அரசியலில் விசிக வெளியேறி, பாமக உள்ளே வரும் வகையிலான ஒரு புதிய கூட்டணி மாற்றம் மிக விரைவில் அரங்கேறலாம் என எதிர்பார்க்கப்படுகிறது.