“ஊரான் வீட்டு நெய்யில ஸ்வீட்டா?”…. முரசொலி போட்ட போடு… அலறும் தமிழக அரசியல்…. விஜய்க்கு விழுந்த சம்மட்டி அடி….!

கரூர் நெரிசல் சம்பவத்தில் உயிரிழந்தவர்களின் குடும்பத்தினருக்கு முதலமைச்சர் விஜய் வழங்கிய அரசுப் பணி நியமன ஆணைகளை சென்னை உயர்நீதிமன்ற மதுரை கிளை ரத்து செய்துள்ள சம்பவம், தமிழக அரசியல் களத்தில் பெரும் புயலைக் கிளப்பியுள்ளது. 41 பேர் உயிரிழந்த இந்தத் துயரச் சம்பவத்தில் பாதிக்கப்பட்ட குடும்பங்களுக்குக் கருணை அடிப்படையில் அரசு வேலை வழங்க மாநில அரசு நடவடிக்கை எடுத்திருந்தது. எனினும், இந்த நியமனத்தை எதிர்த்துத் தொடரப்பட்ட மனுவை விசாரித்த உயர்நீதிமன்றம் அரசாணையை ரத்து செய்த நிலையில், இந்த உத்தரவை எதிர்த்து தமிழக அரசு தற்போது உச்சநீதிமன்றத்தில் மேல்முறையீடு செய்துள்ளது.

இந்நிலையில், திமுகவின் அதிகாரப்பூர்வ நாளேடான ‘முரசொலி’, “ஊரான் வீட்டு நெய்யில உங்க வீட்டுக்கு ஸ்வீட் செய்யாதீங்க” எனும் தலைப்பில் முதலமைச்சர் விஜய்யைக் கடுமையாக விமர்சித்து தலையங்கம் வெளியிட்டுள்ளது. “ஊரான் வீட்டு நெய்யில் ஸ்வீட் செய்யாதீங்க” என்பது விஜய்யின் புகழ்பெற்ற பொன்மொழிகளில் ஒன்று என்பதைச் சுட்டிக்காட்டியுள்ள அக்கட்டுரை, தனது அரசியல் பிம்பத்தைக் காப்பாற்றிக் கொள்ளவும், வழக்கில் இருந்து தப்பவும் அரசுப் பணிகளைப் பயன்படுத்தி விஜய் சுயலாபம் தேடுகிறார் எனச் சாடியுள்ளது. மேலும், சம்பவம் நடந்த காலகட்டம் முதல் தற்போதைய ஆட்சி நிர்வாக நடவடிக்கைகள் வரை பல நிகழ்வுகளை மேற்கோள்காட்டி கடுமையான விமர்சனங்களை முன்வைத்துள்ளது.

முன்னதாக, கரூர் சம்பவத்தில் உயிரிழந்தவர்களுக்கு அரசு வேலை வழங்குவது எந்த வகையில் சாத்தியமாகும் எனக் கேள்வி எழுப்பி நாம் தமிழர் கட்சி நிர்வாகி தொடர்ந்த வழக்கில், உயர்நீதிமன்ற மதுரை கிளை காரசாரமான கருத்துக்களைப் பதிவு செய்தது. “தினமும் நடக்கும் சாலை விபத்துகள், தீ விபத்துகள் மற்றும் பட்டாசு ஆலை விபத்துகளில் உயிரிழப்போரின் குடும்பங்களுக்கும் அரசுப் பணி கேட்கத் தொடங்கினால் என்ன செய்வீர்கள்? ஏராளமான இளைஞர்கள் அரசுப் பணிக்காகக் காத்திருக்கும் போது இவர்களுக்கு மட்டும் எவ்வாறு முன்னுரிமை தரப்பட்டது?” எனக் கேள்வி எழுப்பிய நீதிபதிகள், பாதிக்கப்பட்ட குடும்பங்களுக்கு அரசுப் பணிக்கு பதிலாகத் திறன் மேம்பாட்டுப் பயிற்சிகளை வழங்குவதே முறையானது என்றும் வழிகாட்டினர்.

அத்துடன், கரூர் விபத்து தொடர்பாகவும் அதைத் தொடர்ந்து எடுக்கப்பட்ட நிர்வாக சீர்திருத்தங்கள் குறித்தும் முரசொலி நாளேடு பல்வேறு குற்றச்சாட்டுகளை அடுக்கிக் கூறியுள்ளது. கரூர் வட்டாரத்தில் பணியாற்றிய 19 காவல் அதிகாரிகளை ஒட்டுமொத்தமாக இடமாற்றம் செய்தது சி.பி.ஐ விசாரணைக்குரிய சாட்சியங்களை அச்சுறுத்தும் பழிவாங்கும் நடவடிக்கை என்றும், முன்னாள் அமைச்சர் செந்தில் பாலாஜி மீது தொடரப்படும் நடவடிக்கைகள் அரசியல் ரீதியான மிரட்டல் என்றும் அதில் சுட்டிக்காட்டப்பட்டுள்ளது. மேலும், இந்த விவகாரத்தில் நியமிக்கப்பட்ட அதிகாரிகளை உளவுத்துறையில் அமர்த்தியது வரை அனைத்தும் விஜய்யின் சுய பாதுகாப்புக்கான முயற்சிகள் என்றும் அதில் விமர்சிக்கப்பட்டுள்ளது.

தமிழக அரசின் இந்தக் கொள்கை முடிவை சென்னை உயர்நீதிமன்றம் ரத்து செய்துள்ளதைத் தொடர்ந்து, இந்த விவகாரம் தற்போது உச்சநீதிமன்றத்தின் கதவுகளைத் தட்டியுள்ளது. அரசுப் பணி நியமனம் என்பது அரசின் கொள்கை முடிவு என்ற வாதத்துடன் மேல்முறையீடு செய்யப்பட்டுள்ள நிலையில், இதில் உச்சநீதிமன்றம் வழங்கப்போகும் தீர்ப்பு என்ன என்பதில் பெரும் எதிர்பார்ப்பு நிலவுகிறது. அதேவேளையில், நீதிமன்றத்தின் இந்த அதிரடி உத்தரவை மையமாக வைத்து ஆளும் தமிழக வெற்றிக் கழகத்திற்கும் திமுக உள்ளிட்ட எதிர்க்கட்சிகளுக்கும் இடையேயான அரசியல் மோதல் மேலும் தீவிரமடைந்துள்ளது.