“சீட் பங்கீட்டில் ஸ்டாலின் வைத்த ட்விஸ்ட்”…. 22 கட்சிகள்.. 82 இடங்கள்.. யாருக்கு என்ன? கசிந்தது அதிரடி பட்டியல்…!

தமிழகத்தில் 2026-ஆம் ஆண்டு நடைபெறவுள்ள சட்டமன்றத் தேர்தலை முன்னிட்டு, அரசியல் களம் சூடுபிடிக்கத் தொடங்கியுள்ளது. குறிப்பாக, திமுக தலைமையிலான கூட்டணி, தொகுதிப் பங்கீடு தொடர்பான ஆலோசனைகளை இறுதிக்கட்டத்திற்கு கொண்டு சென்றுள்ளது. கூட்டணி கட்சிகளுடனான பேச்சுவார்த்தைகளைத் திட்டமிட்டபடி சிறப்பாக முன்னெடுத்து வரும் திமுக, வரும் புதன்கிழமைக்குள் தொகுதிப் பங்கீட்டை முடித்துவிட்டு, இறுதிப் பட்டியலை வெளியிடத் திட்டமிட்டுள்ளதாகத் தகவல்கள் வெளியாகியுள்ளன.

திமுக கூட்டணியில் காங்கிரஸ், விசிக, மதிமுக, கம்யூனிஸ்ட் கட்சிகள் உள்ளிட்ட சுமார் 22 கட்சிகள் இடம்பெற்றுள்ளன. தற்போதுள்ள தகவல்களின்படி, கூட்டணிக் கட்சிகளுக்கு மொத்தம் 82 தொகுதிகள் வரை ஒதுக்கப்படலாம் எனக் கருதப்படுகிறது. இதில் காங்கிரஸ் கட்சிக்கு 28 தொகுதிகள் மற்றும் ஒரு மாநிலங்களவை இடம் வழங்கப்படலாம் என்று பேசப்படுகிறது. மேலும், தேமுதிக, விடுதலைச் சிறுத்தைகள், கம்யூனிஸ்ட் கட்சிகள் மற்றும் மதிமுக உள்ளிட்ட கட்சிகளுக்கும் குறிப்பிட்ட எண்ணிக்கையிலான தொகுதிகள் ஒதுக்கீடு செய்யப்பட வாய்ப்புள்ளது.

மீதமுள்ள 152 தொகுதிகளில் திமுக நேரடியாகத் தனது வேட்பாளர்களை நிறுத்தத் திட்டமிட்டுள்ளது. அதேவேளையில், சில சிறிய கூட்டணிக் கட்சிகள் திமுகவின் சின்னமான “உதயசூரியன்” சின்னத்திலேயே போட்டியிட வாய்ப்புள்ளதாகவும் கூறப்படுகிறது. மதிமுக, மக்கள் நீதி மய்யம் உள்ளிட்ட கட்சிகள் இந்த வரிசையில் இடம் பெறக்கூடும் என்பதால், தேர்தல் களம் சுவாரஸ்யமான கட்டத்தை எட்டியுள்ளது.

முதலமைச்சர் மு.க.ஸ்டாலின் தலைமையில் அமைக்கப்பட்டுள்ள பல்வேறு குழுக்கள், இந்தத் தேர்தல் பணிகளை ஒருங்கிணைந்து செயல்படுத்தி வருகின்றன. அமைச்சர் கே.என்.நேரு உள்ளிட்டோர் கூட்டணி பேச்சுவார்த்தைகளை முன்னெடுத்து வரும் நிலையில், தேர்தல் வாக்குறுதிகளைத் தயாரிக்கும் பணியில் கனிமொழி எம்.பி. உள்ளிட்டோர் ஈடுபட்டுள்ளனர். இந்த ஒருங்கிணைந்த செயல்பாடுகள், வரும் தேர்தலில் திமுக தனது கூட்டணியை எவ்வாறு வலுவாகக் கட்டமைத்துள்ளது என்பதைக் காட்டுகிறது.