இயக்குனர் ஆவதற்கு முன்பே நடிகர்களான வெற்றிமாறனும், மிஷ்கினும்… அதுவும் எந்த படத்தில் தெரியுமா?

தமிழ் சினிமாவில் இன்றிருக்கும் நம்பிக்கைக்குரிய இயக்குனர்களில் முதன்மையானவராக இருக்கிறார் வெற்றிமாறன். பொல்லாதவன், ஆடுகளம், விசாரணை, வட சென்னை, அசுரன் மற்றும் விடுதலை என குறைவான படங்களையே அவர் இயக்கி இருந்தாலும் அந்த படங்களின் தாக்கம் மிக அதிகமாக இருக்கிறது.

முன்னணி நடிகர்களை வைத்து கதையில் சமாதானங்கள் இல்லாமல் அவர் எடுக்கும் படங்கள் கமர்ஷியலாகவும் வெற்றி பெறுகின்றன. இதனால் அவர் இயக்கத்தில் நடிக்க முன்னணி நடிகர்கள் ஆசைப்படுகிறார்கள். தற்போது விடுதலை -2 படத்தை இயக்கி வரும் வெற்றிமாறன் அடுத்து சூர்யாவை வைத்து வாடிவாசல் படத்தை இயக்கவுள்ளார்.

இவர், இயக்குனர் பாலுமகேந்திராவிடம் உதவி இயக்குனராக வேலை செய்துள்ளார். அவர் இயக்கிய தொலைக்காட்சி தொடர்களில் பணியாற்றிய வெற்றிமாறன் உதவி இயக்குனராக வேலை செய்த முதல் திரைப்படம் இயக்குனர் கதிர் இயக்கிய ‘காதல் வைரஸ்’ திரைப்படம். இதில் அவரோடு சக உதவி இயக்குனராக வேலை செய்தவர் இயக்குனர் மிஷ்கின்.

கதிர் இயக்கிய அந்த படத்தில் அப்பாஸ், ரிச்சர்ட், ஸ்ரீதேவி உள்ளிட்ட பலர் நடிக்க, ஏ ஆர் ரஹ்மான் இசையமைத்திருந்தார். படத்தின் பாடல்கள் எல்லாம் ஹிட்டானாலும், படம் அட்டர் ப்ளாப். அந்த தோல்வி காரணமாக இயக்குனர் கதிரால் இப்போது வரை அடுத்த படம் இயக்க முடியவில்லை.

இந்த படத்தில் மிஷ்கின் மற்றும் வெற்றிமாறன் ஆகிய இருவரும் சிறு சிறு வேடங்களில் நடித்தும் உள்ளனர். மிஷ்கின் அப்போது மொட்டையடித்திருந்ததால் இப்போதைய அவரது தோற்றத்துக்கு  சம்மந்தமே இல்லாமல் இருக்கிறார். அதே போல இயக்குனர் வெற்றிமாறனும் அப்போது ஒல்லியாக மீசை தாடி இல்லாமல் கல்லூரி மாணவர் போன்ற தோற்றத்தில் இருக்கிறார். இருவரும் நடித்துள்ள காட்சிகளின் ஸ்க்ரீன்ஷாட்கள் இணையத்தில் வைரலாகி வருகின்றன.