ரஜினிய ஹீரோவாக்குனது எங்கப்பாதான்… ஆனா எங்கேயும் அவர் பேர சொன்னதில்ல- பிரபல இயக்குனரின் மகன் வருத்தம்!

1975 ஆம் ஆண்டு வெளியான அபூர்வ ராகங்கள் திரைப்படத்தின் மூலமாக தமிழ் சினிமாவில் அறிமுகமானார் ரஜினிகாந்த். அந்த படத்தில் ஒரு மிகச்சிறிய வேடமே அவருக்குக் கொடுக்கப்பட்டு இருந்தது. அதன் பிறகு மூன்று முடிச்சு உள்ளிட்ட திரைப்படங்களில் வில்லனாக நடித்து தனக்கென ஒரு ஸ்டைலை உருவாக்கினார்.

அபூர்வ ராகங்கள் படத்தில் ரஜினிகாந்த் கேன்சர் நோயால் பாதிக்கப்பட்டு சீக்கிரமே உயிரிழக்கப் போகும் ஒரு கதாபாத்திரத்தில் நடித்திருந்தார். அதன் பிறகு ரஜினியை சூப்பர் வில்லன் ஆக்கியது பாலச்சந்தர் இயக்கிய மூன்று முடிச்சு திரைப்படம். அதன் பிறகு ரஜினி தமிழ் சினிமாவின் மோஸ்ட் வாண்டட் வில்லன் நடிகர் ஆனார்.

படத்தின் கதாநாயகர்களுக்கு இணையாக அவருக்கும் கைதட்டல், விசில்கள் கிடைக்க ஆரம்பித்தன. இந்த நேரத்தில் பைரவி படத்தில் கதாநாயகனாக நடித்தார் ரஜினி. அந்த படம் வெற்றி பெற்று அவரை நிரந்தரக் கதாநாயகனாக்கி விட்டது. அந்த படத்தைத் தயாரித்தது கதாசிரியர் கலைஞானம். அவருக்கு சமீபத்தில் ரஜினி ஒரு வீடு வாங்கிக் கொடுத்து நன்றிக் கடனை திருப்பி செய்தார்.

ஆனால் அந்த படத்தின் இயக்குனரான எம் பாஸ்கர் குறித்து ரஜினி எங்கேயுமே பேசியதில்லை என அவரின் மகன் பிரபு பாஸ்கர் ஒரு நேர்காணலில் ஆதங்கத்தை வெளிப்படுத்தியுள்ளார். இதுகுறித்து அவர் “அந்த படத்தில் ஹீரோவாக நடிக்க ரஜினி தயங்கினார். ஏனென்றால் அப்போது வில்லனாக பிஸியாக நடித்து நல்ல மார்க்கெட்டில் இருந்தார். அதனால் ஹீரோவாக நடித்து வொர்க் அவுட் ஆகவில்லை என்றால் இருப்பதும் போய்விடும் என அஞ்சினார். ஆனால் என் அப்பாதான் கதையை சொல்லி, கண்டிப்பாக இந்த படம் ஓடும் என்று அவரை சம்மதிக்க வைத்தார்.

அந்த படத்துலதான் ரஜினி சாருக்கு சூப்பர் ஸ்டாருங்குற பட்டமும் போட்டாங்க. அது இன்னைக்கு வர நெலைச்சு நிக்குது. ஆனா அப்பா பேர எங்கயுமே ரஜினி சொன்னதில்லை. அது ஏன்னு எனக்குத் தெரியல” என ஆதங்கத்தை வெளிப்படுத்தியுள்ளார்.