பொல்லாதவன் படத்துல பாலு மகேந்திரா சாருக்கு நிறைவு இல்ல… ஆடுகளம் படத்த எடுக்கும்போதுதான் எனக்கு அந்த நிம்மதி கிடைச்சுது- வெற்றிமாறன்!

தமிழ் சினிமாவில் இன்றிருக்கும் நம்பிக்கைக்குரிய இயக்குனர்களில் முதன்மையானவராக இருக்கிறார் வெற்றிமாறன். பொல்லாதவன், ஆடுகளம், விசாரணை, வட சென்னை, அசுரன் மற்றும் விடுதலை என குறைவான படங்களையே அவர் இயக்கி இருந்தாலும் அந்த படங்களின் தாக்கம் மிக அதிகமாக இருக்கிறது.

முன்னணி நடிகர்களை வைத்து கதையில் சமாதானங்கள் இல்லாமல் அவர் எடுக்கும் படங்கள் கமர்ஷியலாகவும் வெற்றி பெறுகின்றன. இதனால் அவர் இயக்கத்தில் நடிக்க முன்னணி நடிகர்கள் ஆசைப்படுகிறார்கள். தற்போது விடுதலை -2 படத்தை இயக்கி வரும் வெற்றிமாறன் அடுத்து சூர்யாவை வைத்து வாடிவாசல் படத்தை இயக்கவுள்ளார்.

இந்நிலையில் சமீபத்தில் ஒரு நேர்காணலில் வெற்றிமாறன் அவரது குரு பாலு மகேந்திரா பற்றி பேசியுள்ள ஒரு கருத்து கவனம் ஈர்த்துள்ளது. அதில் “ஆடுகளம் படத்தில் பேட்டைக்காரனும் அவரது இளம் மனைவியும் இரவில் தனியாக அமர்ந்து பேசும் ஒரு காட்சியை எடுத்தோம். அதை எடுத்த முடிந்தவுடன் என்னுடைய இணை இயக்குனரான விக்ரம் சுகுமாரனிடம் ‘இந்த காட்சி பாலு மகேந்திரா சாருக்குப் பிடிக்கும்’ என மகிழ்ச்சியாக சொன்னேன்.

ஏனென்றால் பொல்லாதவன் படத்துல எந்தவொரு காட்சியும் பாலு மகேந்திரா சாருக்குப் பிடிச்சிருக்காது. ஏனென்றால் அந்த படத்தில் அவருக்கு எந்த கனெக்‌ஷனும் இருந்திருக்காது. ஆனால் கமர்ஷியலாக ஒரு படம் நல்லா பண்ணியிருக்கேன் என்ற சந்தோஷம் அவருக்கு இருந்தது. ஆனால் ஆடுகளம் காட்சியில் ஒரு 65 வயது முதியவரின் ஆற்றாமையை சொல்லும் விதமாக அந்தக் காட்சியை எடுத்திருந்தோம். அது கண்டிப்பாக சாருக்குக் கனெக்ட் ஆகும் என நினைத்தேன்” எனக் கூறியுள்ளார்.

பாலு மகேந்திரா தன்னுடைய படங்களில் பெரும்பாலும் வன்முறையைத் தவிர்த்துவிடுவார். மெல்லிய உணர்வுகளுக்கு முக்கியத்துவம் கொடுத்தே தனது படங்களை உருவாக்குவார். ஆனால் வெற்றிமாறன் அதற்கு நேர் மாறானவர். அவரது அனைத்துக் கதைகளிலும் வன்முறை முக்கியமான ஒரு அங்கமாக இருக்கும். பொல்லாதவன் படம் பார்த்துவிட்டு ‘உனக்குள்ள இவ்ளோ வன்முறை இருக்காடா வெற்றி’ என்றுதான் பாலு மகேந்திரா கேட்டாராம்.