கோவையில் உள்ள பிரசித்தி பெற்ற கோனியம்மன் கோவிலில் பக்தர்கள் செலுத்திய உண்டியல் காணிக்கைப் பணத்தைத் திருடிய நான்கு ஊழியர்கள் மற்றும் கடமைத் தவறிய நான்கு அதிகாரிகள் என மொத்தம் எட்டு பேர் இந்து சமய அறநிலையத்துறை அமைச்சர் உத்தரவின்படி அதிரடியாகச் சஸ்பெண்ட் செய்யப்பட்டுள்ளனர். கடந்த 15ஆம் தேதி நடைபெற்ற உண்டியல் காணிக்கை எண்ணும் பணியின்போது, சீட்டு விற்பனையாளர் பாலசுப்ரமணியன், அலுவலக உதவியாளர் சரவணன், திருவலகு பிரதீப்குமார் மற்றும் பூசாரி கிருஷ்ணராஜ் ஆகியோர் இணைந்து ஒரு உண்டியல் முழுவதையும் மறைத்து வைத்துப் பணத்தைத் திருடியது விசாரணையில் வெளிச்சத்துக்கு வந்துள்ளது.
கோவிலின் புனிதமான உண்டியல் பணத்தையே குறிவைத்து நடைபெற்ற இந்தத் திருட்டுச் சம்பவம் அப்பகுதி மக்களிடையே பெரும் அதிர்ச்சியையும் கொந்தளிப்பையும் ஏற்படுத்தியுள்ளது. இத்தகைய முறைகேடுகளைத் தடுத்து நிறுத்தத் தவறிய அதிகாரிகளின் மீதும் துறை ரீதியான கடுமையான நடவடிக்கை எடுக்கப்பட்டுள்ளதுடன், சம்பந்தப்பட்ட ஊழியர்கள் மீது காவல் துறையில் புகாரளிக்கப்பட்டு தீவிர விசாரணை முடுக்கிவிடப்பட்டுள்ளது.