ஆண்களுக்குப் பேராபத்து…. 50 ஆண்டுகளில் பாதியாகக் குறைந்த ‘அந்த’ ஹார்மோன்…. இன்றைய தலைமுறைக்கு எச்சரிக்கை….!

ஐம்பது வருடங்களுக்கு முன்பு வாழ்ந்த நம் முன்னோர்களின் ஆரோக்கியத்திற்குச் சத்தான உணவுகளும், மாசுபடாத இயற்கைச் சூழலும் முக்கியக் காரணங்களாக இருந்தன. ஆனால், இன்றைய நவீன உலகில் துரித உணவு கலாச்சாரம் பெருகிவிட்டதோடு, நாம் உண்ணும் காய்கறிகளிலும் பூச்சிக்கொல்லி மருந்துகளின் ஆதிக்கம் அதிகரித்துவிட்டது. இதனால் உணவின் வழியே கிடைக்கும் சத்துக்கள் பாதியாகக் குறைந்து, இளைஞர்களின் ஒட்டுமொத்த உடல் நலம் கடுமையாகப் பாதிக்கப்பட்டுள்ளது. இந்தச் சூழலில், லண்டனில் நடைபெற்ற ஐரோப்பிய மனித இனப்பெருக்கம் மற்றும் கருவியல் சங்கத்தின் கூட்டத்தில் சமர்ப்பிக்கப்பட்ட ஓர் ஆய்வு முடிவு, தற்போதைய ஆண் சமூகத்திற்குப் பெரும் அதிர்ச்சியை ஏற்படுத்தியுள்ளது.

அந்த ஆய்வின்படி, கடந்த 1972-ஆம் ஆண்டு முதல் 2019-ஆம் ஆண்டு வரையிலான காலகட்டத்தில், ஆண்களின் உடலில் சுரக்கும் முக்கிய ஆண்மை ஹார்மோனான ‘டெஸ்டோஸ்டிரோன்’ அளவு சராசரியாக 54 சதவீதம் வரை வீழ்ச்சியடைந்துள்ளது தெரியவந்துள்ளது. ஆண்களின் தசை வலிமை, எலும்புகளின் அடர்த்தி மற்றும் மனநிலை ஆகியவற்றைத் தீர்மானிப்பதில் முக்கியப் பங்கு வகிக்கும் இந்த ஹார்மோன், இவ்வளவு பெரிய அளவில் சரிவைச் சந்தித்திருப்பது உலகளாவிய மருத்துவ அறிவியலாளர்கள் மத்தியில் பெரும் கவலையை உருவாக்கியுள்ளது.

இன்றைய இளைஞர்களிடம் அதிகரித்து வரும் உடல் பருமன் , இளம் வயதிலேயே ஏற்படும் நீரிழிவு நோய் மற்றும் நாம் வாழும் சுற்றுச்சூழலில் கலந்துள்ள ரசாயனக் கழிவுகள் ஆகியவையே இந்த ஆபத்தான நிலைக்கு முதன்மைக் காரணங்களாகக் கூறப்படுகின்றன. இதனை ஆண்களின் இனப்பெருக்க ஆரோக்கியத்தில் ஏற்பட்டுள்ள ஒரு பெரிய நெருக்கடி என்று எச்சரிக்கும் விஞ்ஞானிகள், இப்போதாவது விழித்துக்கொண்டு ஆரோக்கியமான உணவுமுறை மற்றும் உடற்பயிற்சிக்கு மாறாவிட்டால், எதிர்காலத் தலைமுறையின் வாழ்வாதாரமே கேள்விக்குறியாகிவிடும் என்று வலியுறுத்துகின்றனர்.