கர்நாடக மாநிலம் சாம்ராஜ்நகர் மாவட்டம் ஹனூர் தாலுகாவில் உள்ள காவிரி வனவிலங்கு சரணாலயப் பகுதியில், தமிழகத்தைச் சேர்ந்த 3 பேர் கர்நாடக வனத்துறையினரால் சுட்டுக்கொல்லப்பட்ட சம்பவம் பெரும் அதிர்ச்சியையும் பரபரப்பையும் ஏற்படுத்தியுள்ளது. சுதந்திர தினத்தன்று அதிகாலையில் நடைபெற்ற இச்சம்பவம் குறித்து வனத்துறையினரும், உயிரிழந்தவர்களின் குடும்பத்தினரும் வெவ்வேறான தகவல்களைத் தெரிவித்து வருகின்றனர். வனத்துறையினர் தற்காப்புக்காகவே துப்பாக்கிச்சூடு நடத்தியதாகக் கூறும் நிலையில், காணாமல் போன பசு மாடுகளைத் தேடிச் சென்றபோதே அவர்கள் சுடப்பட்டதாக உயிரிழந்தவர்களின் குடும்பத்தினர் குற்றம்சாட்டுகின்றனர்.
இச்சம்பவத்திற்குத் தமிழக முதலமைச்சர் விஜய் தனது கடுமையான கண்டனத்தைப் பதிவு செய்துள்ளார். கர்நாடக வனத்துறை அளித்துள்ள விளக்கம் ஏற்றுக்கொள்ளும்படி இல்லை என்றும், இது ஒரு படுகொலை என்றும் அவர் சாடியுள்ளார். மேலும், இச்சம்பவம் குறித்து நேர்மையான மற்றும் நடுநிலையான உயர்மட்டக் குழு விசாரணை நடத்தப்பட வேண்டும் என அவர் கர்நாடக அரசை வலியுறுத்தியுள்ளார்.
தமிழக முதல்வரின் இந்த அறிக்கைக்குக் கர்நாடக வனத்துறை அமைச்சர் ராமலிங்க ரெட்டி கடும் எதிர்ப்பு தெரிவித்துள்ளார். கர்நாடக மாநிலத்தின் உள்விவகாரங்களில் தமிழக முதல்வர் தலையிட வேண்டிய அவசியமில்லை என்று கேள்வியெழுப்பிய அவர், சம்பவம் தொடர்பாக விசாரணை நடைபெற்று வருவதாகவும், அறிக்கை சமர்ப்பிக்கப்பட்ட பின்னரே அடுத்தகட்ட நடவடிக்கைகள் எடுக்கப்படும் என்றும் தெளிவுபடுத்தியுள்ளார்.
இதே விவகாரத்தில் கர்நாடக முதல்வர் டி.கே. சிவகுமார் சட்டப்பேரவையில் பேசுகையில், ஒரு மாநிலம் மற்றொரு மாநிலத்தின் நிர்வாக நடவடிக்கைகளில் தலையிடக் கூடாது என்று மறைமுகமாகக் கண்டனம் தெரிவித்துள்ளார். தமிழக தலைவர்கள் தங்கள் மாநிலப் பணிகளை மட்டும் கவனிக்கட்டும் என்றும், தங்கள் மாநிலத்தைப் பாதுகாப்பது எப்படி என்று தங்களுக்குத் தெரியும் என்றும் கூறி, இந்த விவகாரத்தில் இரு மாநில அரசியல் சூழலிலும் பெரும் பரபரப்பை ஏற்படுத்தியுள்ளார்.