கர்நாடக அரசியலில் க்ளைமாக்ஸ்!.. சித்தராமையா காலில் விழுந்த டி.கே.சிவகுமார்.. முடிவுக்கு வந்த முதல்வர் நாற்காலி சண்டை.. பரபரக்கும் அரசியல் களம்..!!

கடந்த 2023ஆம் ஆண்டு நடைபெற்ற கர்நாடக சட்டமன்றத் தேர்தலில் காங்கிரஸ் கட்சி அபார வெற்றி பெற்று ஆட்சி அமைத்ததைத் தொடர்ந்து, சித்தராமையா முதலமைச்சராகவும், டி.கே. சிவகுமார் துணை முதலமைச்சராகவும் பொறுப்பேற்றனர். கட்சியின் வெற்றிக்கு இருவருமே முக்கியக் காரணியாக இருந்ததாலும், தனித்தனி செல்வாக்கு பெற்றிருந்ததாலும் முதலமைச்சர் பதவியைப் பகிர்ந்துகொள்வதில் தொடக்கம் முதலே போட்டி நிலவியது. ஐந்தாண்டு கால ஆட்சியில் முதல் பாதியில் சித்தராமையாவும், இரண்டாம் பாதியில் டி.கே. சிவகுமாரும் முதலமைச்சராக நீடிக்க காங்கிரஸ் தலைமை சமரசம் செய்ததாகக் கூறப்பட்ட நிலையில், முதல் பாதி முடிந்தும் சித்தராமையா பதவியை விட்டுத்தரத் தயங்கியதால் சிவகுமார் ஆதரவாளர்கள் போர்க்கொடி தூக்கினர். இந்த நீண்டகால அரசியல் இழுபறிக்கு டெல்லி மேலிடத் தலையீட்டின் மூலம் தற்போது ஒரு திடீர் திருப்பம் ஏற்பட்டுள்ளது.

நம்பத்தகுந்த வட்டாரங்களின்படி, முதலமைச்சர் பதவியிலிருந்து விலக சித்தராமையா இறுதியாகச் சம்மதித்துள்ளதாகத் தெரிகிறது. இதன் வெளிப்பாடாக, முதலமைச்சரின் அதிகாரப்பூர்வ இல்லத்தில் நடைபெற்ற முக்கிய அமைச்சர்கள் கலந்துகொண்ட காலை உணவு கூட்டத்தின் போது, துணை முதலமைச்சர் டி.கே. சிவகுமார், முதலமைச்சர் சித்தராமையாவை நெகிழ்ச்சியுடன் கட்டியணைத்து, அவரது கால்களைத் தொட்டு வணங்கியுள்ளார். இந்தச் சம்பவம் கர்நாடக காங்கிரஸில் அதிகாரப் பகிர்வு சுமுகமாக நடைபெறுவதை உறுதிப்படுத்துவதாக அரசியல் வல்லுநர்கள் கருதுகின்றனர். சித்தராமையா தனது ராஜினாமா முடிவை இன்று முறைப்படி அறிவிப்பார் என்றும், இதற்காக மாநில ஆளுநர் தாவர் சந்த் கெலாட்டைச் சந்திக்க அவர் அனுமதி கோரியிருந்ததாகவும் காங்கிரஸ் வட்டாரங்கள் தெரிவிக்கின்றன.

இருப்பினும், ஆளுநர் தாவர் சந்த் கெலாட் தனது குடும்ப விவகாரம் காரணமாக தற்போது பெங்களூருவில் இல்லை என்றும், அவர் இந்தூருக்குப் பயணம் மேற்கொண்டுள்ளதால் சித்தராமையா தனது ராஜினாமா கடிதத்தைச் சமர்ப்பிப்பதில் தற்காலிகத் தாமதம் ஏற்பட்டுள்ளது என்றும் ராஜ் பவன் வட்டாரங்கள் உறுதிப்படுத்தியுள்ளன. இதற்கிடையில், முதல்வர் பதவியை விட்டுக்கொடுக்கும் சித்தராமையாவுக்குத் தேசிய அளவில் முக்கியப் பொறுப்பு மற்றும் மாநிலங்களவை எம்பி (Rajya Sabha MP) பதவி ஆகியவற்றை வழங்க காங்கிரஸ் மேலிடம் முன்வந்துள்ளது. ஆனால், தமக்கு டெல்லி அரசியலுக்குச் செல்ல விருப்பமில்லை என்றும், தொடர்ந்து கர்நாடக சட்டமன்ற உறுப்பினராகவே (MLA) நீடிக்க விரும்புவதாகவும் சித்தராமையா தனது நிலைப்பாட்டைத் தெரிவித்துள்ளதாகத் தகவல்கள் வெளியாகியுள்ளன.