பீகார் மாநிலம் பாட்னாவில் உள்ள பார்ஹ் நகருக்கு உட்பட்ட உமாநாத் கங்கா காட் அருகே, சுமார் 14 பயணிகளுடன் சென்ற படகு ஒன்று கங்கை நதியில் கவிழ்ந்து பயங்கர விபத்துக்குள்ளானது. அந்தப் படகு கங்கை நதியின் நடுவே சென்றுகொண்டிருந்த போது, எதிர்பாராதவிதமாகத் திடீரென வீசிய பலத்த காற்று மற்றும் சீரற்ற வானிலை காரணமாகக் கட்டுப்பாட்டை இழந்து ஆற்றில் தலைகீழாகக் கவிழ்ந்தது. இந்த விபத்தின் போது படகில் இருந்தவர்களில் 7 பேர் ஆற்று நீரில் மூழ்கியிருக்கலாம் என அஞ்சப்பட்ட நிலையில், நல்வாய்ப்பாக மற்ற பயணிகள் அருகில் இருந்த மற்றொரு படகின் உதவியுடன் உடனடியாகப் பத்திரமாக மீட்கப்பட்டனர்.
ஆற்று நீரில் மூழ்கிய 7 பேரில், தற்போதைய நிலவரப்படி இரண்டு பேரின் உடல்கள் மீட்கப்பட்டுள்ளதாக அதிகாரிகள் தெரிவித்துள்ளனர். மேலும், நீரில் மூழ்கி மாயமான மற்ற 5 பேரின் கதி என்னவென்று தெரியாததால் அவர்களைத் தேடும் பணி தீவிரப்படுத்தப்பட்டுள்ளது. இச்சம்பவம் குறித்துத் தகவல் அறிந்தவுடன் மாநிலப் பேரிடர் மீட்புப் படையினர் (SDRF) மற்றும் உள்ளூர் நீச்சல் வீரர்கள் சம்பவ இடத்திற்கு விரைந்து வந்து, ஆற்றில் மாயமான ஐந்து பேரையும் தேடும் மீட்புப் பணியில் முழுவீச்சில் ஈடுபட்டு வருகின்றனர்.