மகாராஷ்டிரா மாநிலம் புனேவில் உள்ள கல்யாணி நகர் பகுதியில், சாலையில் நின்று செல்போனில் பேசிக்கொண்டிருந்த நபரிடம் நூதன முறையில் பணம் பறிக்கப்பட்ட சம்பவம் பெரும் அதிர்ச்சியை ஏற்படுத்தியுள்ளது. இருசக்கர வாகனத்தில் வந்த அடையாளம் தெரியாத இரண்டு நபர்கள், அந்த நபரிடம் “எங்களை ஏன் கோபமாக முறைத்துப் பார்க்கிறாய்?” என்று கூறி அநாவசியமாக வாக்குவாதத்தில் ஈடுபட்டுள்ளனர். தொடர்ந்து, அவரை கொலை செய்துவிடுவதாக மிரட்டி அவரிடமிருந்த 15 ஆயிரம் ரூபாயை வலுக்கட்டாயமாகப் பறித்துக்கொண்டு அங்கிருந்து தப்பிச் சென்றனர்.
இந்தச் சம்பவம் தொடர்பாக ஏரவாடா காவல் நிலையத்தில் வழக்கு பதிவு செய்யப்பட்டது. புகாரைப் பெற்றுக்கொண்ட காவல்துறையினர், குற்றவாளிகளைப் பிடிப்பதற்காக அப்பகுதியில் இருந்த சுமார் 87 சிசிடிவி கேமராக்களின் பதிவுகளைத் தீவிரமாக ஆய்வு செய்தனர். தொழில்நுட்ப உதவியுடன் நடத்தப்பட்ட இந்த விசாரணையின் முடிவில், ஹடப்சர் பகுதியைச் சேர்ந்த இரண்டு பழைய குற்றவாளிகளைப் பிடித்து காவல்துறையினர் அதிரடியாகக் கைது செய்துள்ளனர்.