கர்நாடக மாநிலம் புத்தூர் தாலுகா ஆர்யபு மேர்லாவைச் சேர்ந்தவர் கார்த்திக் சுவர்ண மேர்லா (27). இவர் அப்பகுதி இந்து ஜாக்ரன் வேதிகா அமைப்பின் தாலுகா பொதுச்செயலாளராகப் பணியாற்றி வந்தார். கடந்த 2019 செப்டம்பர் 3-ஆம் தேதி இரவு, சம்ப்யா போலிஸ் நிலையம் எதிரே அமைக்கப்பட்டிருந்த விநாயகர் சதுர்த்தி பந்தலில் யக்ஷகான நாடகக் கலை நிகழ்ச்சியைக் கார்த்திக் பார்த்துக் கொண்டிருந்தார்.
அப்போது, பழைய நிதித் தகராறு காரணமாக அங்கு வந்த பிரீதேஷ் ஷெட்டி, கிரண் ராய் மற்றும் சரண் ராஜ் ராய் ஆகியோர் கார்த்திக்கிடம் தகராறில் ஈடுபட்டுள்ளனர். தகராறு முற்றிய நிலையில், கிரண் ராயும் சரண் ராஜும் கார்த்திக்கின் கைகளைப் பிடித்துக் கொள்ள, பிரீதேஷ் ஷெட்டி கூர்மையான கத்தியால் கார்த்திக்கின் நெஞ்சில் குத்திக் கொடூரமாகக் கொலை செய்தார்.
இவ்வழக்கை விசாரித்த புத்தூரின் 5-வது கூடுதல் மாவட்ட மற்றும் அமர்வு நீதிமன்ற நீதிபதி சதானந்த நாகப்பா நாயக், குற்றம் சாட்டப்பட்ட பிரீதேஷ் ஷெட்டி மற்றும் கிரண் ராய் ஆகிய இருவருக்கும் ஆயுள் தண்டனையும், தலா ரூ.3 லட்சம் அபராதமும் விதித்துத் தீர்ப்பளித்துள்ளார். மேலும் அபராதத் தொகையிலிருந்து ரூ.5.90 லட்சத்தைக் கொல்லப்பட்ட கார்த்திக்கின் தாயார் ஹேமாவதிக்கு இழப்பீடாக வழங்க உத்தரவிட்டுள்ளார்.