ஆந்திர மாநிலம் மேற்கு கோதாவரி மாவட்டம் பீமாவரம் அல்லம்வாரி தோட்டா பகுதியைச் சேர்ந்த 14 வயதான மாதவி, அப்பகுதியில் உள்ள பள்ளியில் 9-ஆம் வகுப்பு படித்து வந்தார். ஞாயிற்றுக்கிழமை இரவு நேரத்தில் சிறுமி மாதவி திடீரென வீட்டை விட்டு வெளியேறி மாயமாகியுள்ளார்.
அப்பகுதியில் சென்ற ஆட்டோ ஓட்டுநர் ஒருவர், சிறுமி தனியாக நடமாடுவதைப் பார்த்துச் சிறுமியின் தந்தைக்குத் தகவல் தெரிவித்துள்ளார். இதனையடுத்து பெற்றோர் சிறுமியைப் பத்திரமாக வீட்டிற்கு அழைத்து வந்தனர். ஆனால், திங்கள்கிழமை காலையில் சிறுமி மாதவி தனது வீட்டின் உள்ளேயே தூக்கில் தொங்கிய நிலையில் பிணமாகக் கண்டெடுக்கப்பட்டார்.
14 வயதே ஆன 9-ஆம் வகுப்பு பள்ளி மாணவி தூக்கிட்டுத் தற்கொலை செய்து கொண்ட சம்பவம் அப்பகுதியில் பெரும் சோக அலையை ஏற்படுத்தியுள்ளது. இச்சம்பவம் குறித்து வழக்குப் பதிவு செய்த பீமாவரம் ஒன் டவுன் போலிஸார், சிறுமி இரவில் வெளியேறியதற்கும் தற்கொலை செய்து கொண்டதற்கும் பின்னணியில் உள்ள காரணங்கள் குறித்துத் தீவிரமாக விசாரணை நடத்தி வருகின்றனர்.