தமிழகத்தில் விரைவில் சட்டமன்ற இடைத்தேர்தல் மற்றும் உள்ளாட்சித் தேர்தல்கள் நடைபெறவுள்ள சூழலில், அரசியல் களம் புதுவேகம் பெற்றுள்ளது. பெரும்பான்மை பலம் இல்லாத நிலையிலும் பிற கட்சிகளின் ஆதரவோடு ஆட்சி அமைத்த தமிழக வெற்றிக் கழகம், வரவிருக்கும் தேர்தல்களைக் கூட்டணியாக இணைந்து சந்திக்க தீவிர திட்டமிட்டு வருகிறது. ஆட்சி அமைந்த சமயத்தில் விசிக, காங்கிரஸ் மற்றும் ஐயுஎம்எல் போன்ற தோழமைக்கட்சிகள் அமைச்சரவையில் பங்கேற்ற நிலையில், இரு கம்யூனிஸ்ட் கட்சிகளும் வெளியிலிருந்து நிபந்தனையற்ற ஆதரவு அளித்தன. வெளிப்படையான ஆட்சி அதிகாரத்தில் பங்கெடுக்காவிட்டாலும், தம் கூட்டணி அரசிற்கு இவர்களின் ஆதரவு தொடரும் என்ற நம்பிக்கையில் முதல்வர் விஜய் இருந்தார்.
ஆனால், தவெக ஆட்சியின் தொடக்கக் கால நடவடிக்கைகளே இடதுசாரி இயக்கங்களுடனான விரிசலுக்கு முக்கியக் காரணமாயின. நீட் தேர்வுக்கு எதிரான போராட்டத்தின்போது இடதுசாரி மாணவர் அமைப்பைச் சேர்ந்த தலைவர்கள் கைது செய்யப்பட்டது, இடதுசாரிகளைக் கண்காணிக்கும் உத்தரவுகள் மற்றும் தூய்மைப் பணியாளர்களின் போராட்டத்தைக் கையாண்ட விதம் போன்ற சம்பவங்கள் கம்யூனிஸ்ட்டுகள் மத்தியில் பெரும் அதிருப்தியை ஏற்படுத்தின. “அதிகாரிகளின் பேச்சைக் கேட்கும் அரசாக இருக்கிறதா?” என்ற கேள்வியையும், தங்களுக்கு எதிரான நடவடிக்கைகளைக் கண்டித்தும் இடதுசாரிகள் உரக்கக் குரல் எழுப்பியதால், கூட்டணிக்குள் உரசல் உச்சக்கட்டத்தை எட்டியது.
வரவிருக்கும் தேர்தல்களை சுமூகமாக எதிர்கொள்ளும் நோக்கில், கூட்டணியை ஒருங்கிணைக்க முதல்வர் விஜய் முன்னெடுத்த முதல் ஆலோசனைக் கூட்டத்தை இரு கம்யூனிஸ்ட் கட்சிகளும் புறக்கணித்தன. இதனால் அதிர்ச்சியடைந்த தவெக அமைச்சர்கள், செப்டம்பர் 8-ல் நடைபெறவுள்ள அடுத்தகட்ட ஆலோசனைக் கூட்டத்தில் பங்கேற்குமாறு நேரில் சென்று அழைப்பு விடுத்தனர். இதுகுறித்து விளக்கமளித்த இந்திய கம்யூனிஸ்ட் கட்சியின் (சிபிஐ) மாநிலச் செயலாளர் வீரபாண்டியன், “நாங்கள் தவெக கூட்டணியிலும் அமைச்சரவையிலும் இல்லை. அடுத்த கூட்டத்தில் பங்கேற்பது குறித்துக் கட்சியே முடிவெடுக்கும். பாஜக அரசை வீழ்த்த ‘இந்தியா’ கூட்டணியை வலுப்படுத்துவதே எங்களின் முதன்மை இலக்கு” என்று வெளிப்படையாகத் தெரிவித்தார்.
மத்தியில் பாஜகவை எதிர்ப்பதில் மட்டுமே கவனம் செலுத்தும் கம்யூனிஸ்ட்டுகளின் இந்தத் தீர்க்கமான நிலைப்பாடு, தவெக தலைமையை பெரும் குழப்பத்திலும் டென்ஷனிலும் ஆழ்த்தியுள்ளது. தேசிய அளவில் ‘இந்தியா’ கூட்டணியை வலுப்படுத்துவோம் என்று அவர்கள் கூறுவது, மாநிலத்தில் தவெகவுக்கு அளித்து வந்த ஆதரவைக் கைவிடுவதற்கான அறிகுறியா அல்லது வெளியிலிருந்து மட்டும் ஆதரவு தரும் முந்தைய நிலைப்பாடா என்ற கேள்வி எழுந்துள்ளது. தேர்தல்கள் நெருங்கும் நேரத்தில் கூட்டணி வண்டியில் ஏற்பட்டுள்ள இந்தத் தொடர் விரிசல்களும் குழப்பங்களும், உள்ளாட்சித் தேர்தலை சுமூகமாகச் சந்திக்க நினைத்த முதல்வர் விஜய்க்குப் புதிய அரசியல் சவாலை உருவாக்கியுள்ளன.